Pirro Vengu reagon për protestat: Studentët e duan Shqipërinë

Ish-ministri Pirro Vengu ka reaguar pas protestës së studentëve në Tiranë, duke shprehur qëndrimin e tij kundër dhunës dhe ndërhyrjeve politike në kauzën e të rinjve.

Në reagimin e publikuar, Vengu vlerëson se studentët kanë zërin dhe arsyet e tyre për të protestuar, por nuk duhet të përdoren nga aktorë politikë për interesa të tjera. Ai thekson gjithashtu se e drejta për të protestuar shoqërohet me të drejtën për të mos marrë pjesë në tubime.

“Unë besoj se Shqipëria është e bekuar me të rinjtë që ka. Studentët e duan Shqipërinë, e duan atdheun. Nuk e djegin!”, shkruan Vengu.

Reagimi i plotë:

Unë besoj se Shqipëria është e bekuar me të rinjtë që ka. Studentët e duan Shqipërinë, e duan atdheun. Nuk e djegin!

Studentët nuk kanë nevojë për suplement politik që t’i orientojë, as për kujdestarë që të flasin në emër të tyre. Ata kanë zërin, arsyet dhe të drejtën e tyre për të protestuar. Po aq sa kanë të drejtën të zgjedhin të mos protestojnë.

Shqetësimet dhe aspiratat e tyre meritojnë të dëgjohen. Por dhuna dhe vandalizmi nuk i shërbejnë asnjë kauze. Zemërimi dhe pakënaqësia nuk i përligjin. Ata që ushtrojnë dhunë verbërisht e pastaj fshihen pas studentëve, po e përdorin kauzën e tyre.

Pedagogët që kërcënojnë me ulje notash ata që nuk protestojnë, apo deputetët që kërkojnë të rishpikin veten në kurriz të dilemave dhe aspiratave legjitime të rinisë, vetëm sa e thellojnë hendekun e besimit me një brez që paragjykohet shumë dhe dëgjohet pak.

Të rinjtë meritojnë të dëgjohen dhe të vendosin vetë. Edhe kur protestojnë. Edhe kur zgjedhin të mos protestojnë.