Prenga nuk ia del, Joshua e mposht me ‘Knock Out’ spektakolar

Kristian Prenga nuk arriti të bëjë surprizën përballë Anthony Joshua, duke u mposhtur me nokaut në raundin e dytë të duelit spektakolar të zhvilluar në Arabinë Saudite.

Boksieri shqiptar e nisi ndeshjen me guxim dhe agresivitet, duke i krijuar vështirësi ish-kampionit të botës në momentet e para të përballjes. Prenga tregoi vendosmëri dhe nuk u tërhoq përballë një prej emrave më të mëdhenj të boksit botëror.

Megjithatë, eksperienca dhe cilësia e Anthony Joshua-s bënë diferencën. Britaniku reagoi shpejt, mori kontrollin e ritmit të sfidës dhe në raundin e dytë gjeti goditjet vendimtare, duke e mbyllur ndeshjen me nokaut.

Fitorja i siguroi Joshua-s një tjetër sukses në karrierë, ndërsa për Kristian Prengën, pavarësisht humbjes, kjo ishte një mundësi për t’u përballur me një nga ikonat e peshave të rënda dhe për të fituar eksperiencë në nivelin më të lartë të boksit profesionist.