Presidenti Trump emëron ambasadorin e ri në Shqipëri, zbulohet emri

Është emëruar ambasadori i ri në Tiranë. Kathleen Ann Kavalec do të jetë ambasadorja e Shteteve të Bashkuara të Amerikës në Shqipëri, e emëruar nga Donald Trump.

Presidenti Donald Trump njoftoi sot se Kathleen Ann Kavalec është emri që propozohet për Ambasadore e SHBA në Shqipëri.

Kavalec do të zëvendësojë Donald Lu i cili pritet të largohet këtë muaj nga Shqipëria.

Zonja Kavalec aktualisht shërben si Zëvendës Ndihmës Sekretare në Zyrën e Çështjeve Evropiane dhe Euroaziatike në Departamentin e Shtetit, ndërsa mësohet se ka më shumë se tre dekada përvojë si diplomate.

Më herët, ajo ka shërbyer si Drejtoreshë e Zyrës së Çështjeve të Rusisë, Zëvendës Shefe e Misionit të SHBA në UNESCO në Paris, Zëvendës Koordinatore e Ndihmës në Zyrën e Çështjeve Evropiane dhe Drejtore për Parandalimin e Konflikteve në Zyrën e Koordinatorit për Rindërtimin dhe Stabilizimin.

Kavalec ka mbaruar Universitetin e Kalifornisë në Berkeley dhe ka një master nga Universiteti Georgetown dhe flet rrjedhshëm gjuhët: frënge, rumune, ukrainase, ruse, spanjolle dhe portugeze.

CV e Kathleen Kavalec e publikuar nga DASH:

Kathleen A. Kavalec
Zëvendës ndihmës sekretare
Zyra e Çështjeve Evropiane dhe Euroaziatike
Periudha në detyrë: Nga gusht 2015
Zëvendës ndihmës-sekretarja për Zyrën e Çështjeve Evropiane dhe Euroaziatike në Departamentin e Shtetit, Kathleen Kavalec e ka marrë detyrën si zëvendësndihmës-sekretare në gusht 2015. Në këtë cilësi, ajo është përgjegjëse për Rusinë dhe për Zyrën e Çështjeve Rajonale. Më parë ajo ka shërbyer si Drejtore për Çështjet Ruse në të njëjtën Zyrë.
Para kësaj, ka qenë Zëvendës Shefe e Misionit dhe Zëvendës Delegate e Përhershme në Misionin e SHBA në UNESCO, në Paris (2010-2013). Në periudhën 2009-2010, zonja Kavalec ishte Zëvendës Koordinatore për Asistencën e SHBA për Evropën, Eurazinë dhe Azinë Qendrore.
Ajo ka shërbyer më 2008-2009 edhe si Drejtore e Parandalimit të Konflikteve në Zyrën e Koordinimit për Rindërtim e Stabilizim. Detyrat jashtë vendit kanë përfshirë edhe ture në Ukrainë, Rusi, Rumani e Brazil.
Znj. Kavalec mban një “A.B” në Shkencat Politike nga Universiteti i Kalifornisë në Berkeley dhe një “M.S.F.S” në Shërbimin e Jashtëm nga Universiteti Georgetown. Gjuhët e huaja që flet janë rusishtja, frëngjishtja, spanjishtja, portugalishtja, rumunishtja dhe gjuha ukrainase.