Projekti alarmant për sigurinë, “Smart City”, nis zbatimin në shkolla

Nisja e projektit “Smart City” në Shqipëri po shoqërohet me debate të forta dhe shqetësime në rritje për ndikimin që mund të ketë në privatësinë e qytetarëve. Nisma, e prezantuar si një hap drejt modernizimit urban dhe rritjes së sigurisë, po shihet nga kritikët edhe si një potencial për survejim masiv.

Sipas burimeve, në disa shkolla në Tiranë ka nisur instalimi i kamerave të sigurisë, ndërsa të dhënat e mbledhura pritet të administrohen nga Policia e Shtetit. Ky element ka ngritur pikëpyetje të forta mbi mënyrën e përdorimit dhe ruajtjes së informacionit, veçanërisht kur bëhet fjalë për ambiente të ndjeshme si institucionet arsimore.

Zbatimi i projektit po realizohet nga Presight AI, pjesë e grupit G42, me bazë në Emiratet e Bashkuara Arabe. Sipas një investigimi të BIRN, kjo kompani ka qenë objekt shqyrtimi edhe në Kongresi i Shteteve të Bashkuara për shkak të shqetësimeve mbi lidhje të mundshme me aktorë kinezë.

Ekspertë të të drejtave digjitale paralajmërojnë se implementimi i teknologjive të avancuara, përfshirë inteligjencën artificiale dhe sistemet e analizës së të dhënave, mund të krijojë një infrastrukturë të gjerë monitorimi që prek drejtpërdrejt privatësinë e individëve.

Nga ana tjetër, autoritetet e kanë mbrojtur projektin si një investim strategjik për rritjen e sigurisë publike, parandalimin e kriminalitetit dhe përmirësimin e menaxhimit urban. Sipas tyre, përdorimi i teknologjisë synon jo vetëm reagimin më të shpejtë ndaj incidenteve, por edhe krijimin e një mjedisi më të sigurt për komunitetin.

Megjithatë, një tjetër element që ka ngjallur debat është kostoja e projektit. Fillimisht e parashikuar në rreth 60 milionë dollarë, ajo është raportuar të jetë dyfishuar, duke shtuar pikëpyetje mbi transparencën dhe menaxhimin financiar.

Në këtë klimë, projekti “Smart City” mbetet një nga nismat më të diskutuara, ku balanca mes sigurisë dhe privatësisë po vihet në provë.