PS tërhiqet nga nismat për të nxjerrë Berishën nga Parlamenti

Duke qenë se emri i Ilir Metës u përmend nga Autoriteti i Dosjeve, PS paralajmëroi disa nisma, një prej të cilave dhe ndalimin e spiunëve që të kandidojnë në zgjedhjet e përgjithshme dhe vendore. Por të shtunën kryetarja e Komisionit të Ligjeve Klotilda Bushka tha se PS nuk synon ndalime, por transparencë. Pra PS duket se është tërhequr nga nisma për të penalizuar Ilir Metën.

Por ashtu, u paralajmëruan dy nisma për të penalizuar Sali Berishën. Një nismë për të ndalur ish-funksionarët e Partisë Komuniste dhe një për personat “non grata”. Por duket se nuk do të ketë nisma të tilla. Kjo është konfirmuar nga kreu i grupit parlamentar socialist Taulant Balla.

“Unë vazhdoj ta them që është në turpin e Kuvendit të Shqipërisë që një ish-Sekretar partie dhe që është shpallur “non grata” më 19 maj të vitit 2021, nga Sekretari i DASH për korrupsion dhe minim të demokracisë të vazhdojë të bëjë foltoren e Kuvendit dhe sallën e Kuvendit. Fakti që Berisha  dhe Dodik janë shpallur të dy, me të njëjtat argumentime tregon që është e papranueshme që ky person të jetë në Kuvend. Edhe duke ju nisur ligjit të dekriminalizimit, sipas parim, është e pamundur që këtë çështje ta zgjidhësh me ligj. Pra me pengesë ligjore. Nëse juristë do gjenin një zgjidhje që do ishte e bëshme, nuk e kanë gjetur. Po ashtë e vërtetë që ju kemi kërkuar juristëve ta gjejnë një zgjidhje. Për mua si kundërshtar politik opozita ta mbajë Saliun aty sa të ketë”, tha ai.

Vetë Balla e pranoi deri diku se largimi i Berishës dhe Metës nga politika do ishte kambanë alarmi për PS. Largimi i tyre mund të sjellë një opozitë të re, dhe PS ka vendosur t’i mbajë aty, pasi e ka në interes të saj.