Punonjësi i Policisë Bashkiake të Tiranës dhunon shefin e tij

Një incident i rëndë është regjistruar në Policinë Bashkiake të Tiranës, ku një punonjës ka përfunduar në pranga pasi dyshohet se ka ushtruar dhunë ndaj eprorit të tij gjatë orarit të punës.

Burime zyrtare bëjnë me dije se është arrestuar 31-vjeçari Adi Hazizi, i cili mbante detyrën e punonjësit në Policinë Bashkiake. Ai akuzohet se, për motive që lidhen me detyrën, ka goditur me grusht shefin e Sektorit të Mbikëqyrjes së Territorit, Skënder Delija.

Sipas informacioneve paraprake, konflikti ka nisur pas një vendimi për lëvizjen e Hazizit nga një sektor në një tjetër. Pas komunikimit të këtij vendimi, 31-vjeçari është paraqitur në zyrën e eprorit të tij, ku debati verbal mes tyre ka degraduar në përplasje fizike.

Dyshohet se gjatë konfliktit, Hazizi e ka goditur me grusht shefin e tij, ndërsa ky i fundit ka deklaruar se dhuna është ushtruar për shkak të detyrës dhe lidhet drejtpërdrejt me vendimin për transferimin e vartësit.

Autoritetet kanë ndërhyrë duke arrestuar në flagrancë 31-vjeçarin, ndërsa pritet që hetimet të zbardhin plotësisht rrethanat e ngjarjes dhe përgjegjësitë ligjore.