Qeveria ‘hap thesin’ për festat e fundvitit, kategoritë që përfitojnë

Këshilli i Ministrave ka miratuar Aktin Normativ të Fundvitit, që sjell disa ndryshime në buxhetin e vitit 2025.

Një nga masat kryesore parashikon shpërndarjen e një bonusi prej 15 mijë lekësh të reja për familjet që përfitojnë ndihmë ekonomike, si edhe për personat me aftësi të kufizuar dhe kujdestarët e tyre.

Nga kjo nismë do të përfitojnë rreth 148 500 qytetarë, me një fond total prej rreth 2.2 miliardë lekësh.

Ministri i Financave, Petrit Malaj, theksoi:

“Disa nga çështjet kryesore që miratuam nëpërmjet këtij akti normativ janë mbështetja financiare për familjet që përfitojnë ndihmë ekonomike, si dhe për personat me aftësi të kufizuar dhe kujdestarët e tyre. Masa e mbështetjes, në formën e bonusit të fundvitit, do të jetë 15 mijë lekë ose rreth 150 euro. Në total, nga kjo nismë do të përfitojnë rreth 148 mijë e 500 qytetarë.”

Kjo nismë synon të përforcojë mbështetjen financiare për qytetarët më në nevojë dhe të ndihmojë familjet dhe personat me aftësi të kufizuar gjatë festave të fundvitit.