Qytetarët e Memaliajt të tronditur nga atentati, kamarieri i lokalit dhe klienti, dy viktimat e pafajshme

Gledio Muka është kamerieri 36-vjeçar, i cili mbeti i vrarë në atentatin e mesnatës së kaluar në Memaliaj.

Muka ka qenë në krye të detyrës, duke shërbyer, kur plumbat e kallashnikovit që kishin shënjestër tjetër, i morën jetën.

Si pasojë e këtij atentati mafioz humbi jetën edhe njê tjetër i pafajshëm, klienti 47-vjeçar, Marsel Çela. Ai ka qenë brenda në lokal duke pirë një pije në momentin që plumbat kanë mbërthyer lokalin në qendër të Memaliajt.

Shënjestër e këtij atentati ka qenë 74-vjeçari Shyqyri Kalemi, babai i Andrea dhe Zamir Kalemit. Ai ishte ulur në një tavolinë jashtë lokalit bashkë me vëllain e tij Artur Kalemi, kur plumbat i morën jetën.

Shkaku kryesor i këtij atentati, me dy viktima të pafajshme, dyshohet të jetë hakmarrja pasi dy djemtë e Kalemit u kanë shpëtuar disa atentateve.

Andrea Kalemi dyshohet të jetë i përfshirë në vrasjen e biznesmenit Edmond Papa në dhjetor të 2022. Ndërsa vrasja e tij mendohet se ka patur si motiv hakmarrjen për vrasjen e Aleksandër Sadikajt.

Banorët e Memaliajt janë të tronditur nga atentati me 3 viktima, ndodhur mesnatën e kaluar në një lokal të qytetit.

Duke folur për mediat, njëri prej tyre tha se i njihte dy viktimat e pafajshme, klientin Marsel Çela dhe kamarierin Gledian Muka.

“I njoh për shumë çuna të mirë. Njëri punonte aty, kurse tjetri vinte që konsumonte kafen aty. Të dy janë banorë të zonës. Jemi tronditur shumë nga kjo ngjarje. Të vriten tre veta është fatkeqësi e madhe”.

Ndërsa për shënjestrën Shyqyri Kalemi dhe dy djemtë e tij, fqinjët thonë fjalë të mira.

“Familje e mirë, në punën e tij. Nuk na erdhi mirë kur e dëgjuam. U ndodhëm këtu, nuk vajtëm me tutje se s’dnim gjë. Nuk dëgjova të shtëna. Po rrija këtu deri nga ora 1, të gjithë kishin vajtur unë nuk shkova. Shyqo hallexhi. Jemi tronditur shumë farë. Ky është qamet i madh. I njoh dy çunat dhe atë. Shumë çuna të mirë. Jemi tronditur shumë fare. Jo s’dëgjova gjë të shtëna, sot në mëngjes e mora vesh.”