Këshilli Politik për Reformën Zgjedhore do të mblidhet sot në orën 11.00, për të diskutuar rreth ndryshimeve kushtetuese të miratuara nga Komisioni i Ligjeve, për hapjen e pjesshme të listave dhe heqjen e koalicioneve parazgjedhore.
Edi Rama është vetmi nga “të mëdhenjtë” që do të marrë pjesë në tryezën e bisedimeve përveç përfaqësuesve politikë që hartuan marrëveshjen për Zgjedhoren në 5 qershor. Ndërkohë, Presidenti Meta i cili propozoi që këto ndryshime të diskutohen mes palëve në tryezën e Këshillit Politik nuk e ka pranuar apo konfirmuar ende pjesëmarrjen.
Kujtojmë se, Mazhoranca qeverisëse pranoi kërkesën e opozitës parlamentare, e përfaqësuar në Këshillin Politik nga Myslim Murrizi, për hapjen e listave dhe shtoi kërkesën e saj për heqjen e koalicioneve parazgjedhore. Këto ndryshime shkaktuan reagimin e ndërkombëtarëve dhe të vetë opozitës që i cilësoi ato si “përpjekje të kryeministrit Rama për të kapur zgjedhjet e ardhshme.”
Gjithashtu, kreu i demokratëve Lulzim Basha nuk ka zgjedhur të shkojë vet në tryezën e Këshillit Politik por ka dërguar atje Sekretarin e Partisë Gazment Bardhi, Oerd Bylykbashin dhe Petrit Vasilin e LSI. Sot dhe nesër Basha do të jetë në Kosovë ku do të takohet me drejtuesit më të lartë të shtetit atje.
