Rama thërret drejtuesit e PS në takimin e papritur te Vila e Kuqe

Edi Rama rikthen sot në axhendën politike mbledhjet me drejtuesit politikë të Partisë Socialiste. Kryeministri dhe kreu i PS-së do të mbledhë në orën 12:00 drejtuesit politikë në Vilën e Kuqe në Sauk, në një tjetër takim që vjen pas një serie diskutimesh intensive gjatë javëve të fundit.

Në fokus të mbledhjes pritet të jenë dy nismat e prezantuara nga Rama, “Besa” dhe “Prania Besnike”, si dhe mënyra se si po zbatohet në terren modeli i ri i komunikimit të strukturave socialiste me qytetarët.

Gjatë javëve të fundit, Rama ka shtuar takimet me drejtuesit politikë, ministrat dhe deputetët e PS-së, duke kërkuar një përfshirje më të drejtpërdrejtë të strukturave partiake në kontaktet me qytetarët.

Një prej takimeve kryesore u zhvillua më 23 gusht në Pogradec, ku Rama mblodhi për disa orë të deleguarit politikë, drejtuesit e komisioneve parlamentare dhe deputetët socialistë. Në diskutime u përfshinë edhe “Besa” dhe “Prania Besnike”, së bashku me mënyrën e re të organizimit dhe komunikimit politik.

Më 28 gusht, kryeministri thirri në Vilën e Kuqe ministrat dhe drejtuesit politikë të qarqeve, ndërsa një ditë më vonë zhvilloi një takim me strukturat socialiste të Tiranës, të deleguarit politikë dhe deputetët e qarkut.

Rama u rikthye te të njëjtat prioritete edhe gjatë mbledhjes së 3 shtatorit me Grupin Parlamentar dhe qeverinë. Në këtë takim, “Besa” dhe “Prania Besnike” u prezantuan sërish si elementë të një qasjeje të re në marrëdhënien e Partisë Socialiste me qytetarët.

Ndërkohë, prej 4 shtatorit ka nisur edhe zbatimi në terren i “Pranisë Besnike”. Deputetëve socialistë u është kërkuar që çdo të premte të zhvillojnë takime me qytetarët, të evidentojnë problematikat e tyre dhe më pas t’i ndjekin këto çështje pranë institucioneve përgjegjëse.

Mbledhja e sotme në Sauk pritet të shërbejë për të analizuar ecurinë e kësaj skeme, por edhe për të përcaktuar hapat e mëtejshëm të strukturave të PS-së në terren.

Seria e takimeve të zhvilluara në një hark të shkurtër kohor tregon gjithashtu përpjekjen e Ramës për të mbajtur nën koordinim të drejtpërdrejtë strukturat politike të partisë dhe për t’i dhënë më shumë rëndësi komunikimit të deputetëve me qytetarët.