Fajin e ka sërish opozita

Pas zgjedhjeve të pjesshme lokale të mbajtura në 5 bashki, ku pjesëmarrja e qytetarëve ishte ndër më të ulëtat e viteve të fundit, kryeministri Edi Rama ka dalë me një reagim ku, mes rreshtash, ka zbuluar edhe “shkakun” e rezultatit, motin me shi.

Në një postim plot emoji trëndafilash, kreu i qeverisë uron fituesit socialistë, por pa harruar të përmendë faktorët që – sipas tij – “penguan” qytetarët të shkonin në votime: opozitën e dobët, natyrën e “pjesëshme” të zgjedhjeve, dhe, më në fund, reshjet e shiut që, duket se, paskan qenë pengesa më serioze për demokracinë.

Sipas Ramës, edhe pse moti ishte me re, rezultati mbeti “i kuq flakë”. Të pestë kandidatët e mbështetur nga Partia Socialiste dolën fitues, ndërsa kutitë bosh u justifikuan me “lagështirën” e ditës.

Ja si shkruan ai në rrjete sociale:

🌹🌹🌹🌹🌹5 bashki
🌹🌹🌹🌹🌹5 fitore
🌹🌹🌹🌹🌹dhe 5 arsye më shumë për t’i falenderuar qytetarët për besimin e tyre, pavarësisht dobësisë ekstreme të opozitës, motit me shi të ditës së djeshme, apo vetë natyrës së zgjedhjeve të pjesshme, të cilat nuk se e stimulojnë pjesëmarrjen.

Në stilin e tij të njohur, Rama liston me entuziazëm kryebashkiakët e rinj, përfshirë edhe Brunën në Vlorë – “gruan e parë që do të drejtojë bashkinë” – dhe Ervinin në Berat, që mori mbi 83% të votave.

Ndërsa në rrjetet sociale, shumë qytetarë ironizojnë me “arsyet meteorologjike” të pjesëmarrjes minimale, duke pyetur nëse për zgjedhjet e ardhshme duhet të lutemi për diell që demokracia të “shkëlqejë” më fort.