Reagon Presidenca per Draft Opinionin e Venecias për paketën Anti-shpifje : Konfirmon qëndrimin e Kreut të Shtetit. Liria dhe pavarësia e medias të parat

Me një shënim në facebook, Blushi shkruan se Komisioni i Venecias ka konfirmuar qëndrimin e drejtë të Presidentit Meta, ndërsa e konsideron paketën “anti-kushtetuese”.

Sipas Blushit këto ligje jo vetëm që nuk janë në harmoni, por bien në kundërshtim me parimet themelore të Kushtetutës, nuk janë në harmoni me standartet e Konventës Evropiane të të Drejtave të Njeriut dhe me jurisprudencën e Gjykatës Europianë të të Drejtave të Njeriut.

Paketa antishpifje e qeverisë shqiptare u rrëzua në Komisionin e Venecias, i cili kërkoi rishikimin e tij, duke argumentuar mes të tjerash se shtyp lirinë e medias.

Postimi i plotë:

Ashtu sikundër pritej, Komisioni i Venecias ka konfirmuar qëndrimin e drejtë të Presidentit të Republikës Sh.T.Z Ilir Meta për paketën anti-kushtetuese të ligjeve “anti-shpifje”.

Siç është sqaruar edhe me dekretet e Presidentit Meta, këto ligje jo vetëm që nuk janë në harmoni, por bien në kundërshtim me:

– Parimet themelore kushtetuese të ndërtimit të një shteti demokratik, sigurisë juridike dhe të proporcionalitetit;

– Dispozitat kushtetuese që mbrojnë të drejtën e lirisë së shprehjes, të lirisë së shtypit dhe të drejtës së informimit;

– Jurisprudencën e Gjykatës Kushtetuese të Republikës së Shqipërisë, vendimet e së cilës përbëjnë norma të detyrueshme për zbatim;

– Nuk janë në harmoni me standartet e Konventës Evropiane të të Drejtave të Njeriut;

– Nuk janë në harmoni me jurisprudencën e Gjykatës Europianë të të Drejtave të Njeriut (GJEDNJ)

Pa garantuar lirinë e shprehjes nuk ka demokraci dhe nuk mund të ketë çelje të negociatave për anëtarësim.

LIRIA DHE PAVARËSIA E MEDIAS E PARA!