“Revolucion!”/ Studentët “pushtojnë” sërish Tiranën

Studentë nga fakultete të ndryshme të vendit, të mbështetur nga qytetarë të moshave të ndryshme, kanë dalë në rrugët e kryeqytetit në një protestë që kërkon largimin e kryeministrit Edi Rama. Marshimi vjen pas tensioneve dhe përplasjeve me policinë gjatë protestës së një dite më parë.

Protesta studentore është zhvendosur në bulevardin “Zogu I”, ku është përqendruar një numër i madh pjesëmarrësish. Nga aty, protestuesit janë nisur në drejtim të Ministrisë së Arsimit, duke shoqëruar marshimin me thirrje kundër qeverisë.

“Ju erdhi fundi” dhe “Dorëheqje” janë disa nga sloganet e dëgjuara gjatë protestës, përmes të cilave pjesëmarrësit kanë shprehur pakënaqësinë e tyre ndaj qeverisjes.

Përveç kërkesave politike, një nga arsyet që ka nxitur reagimin e studentëve është edhe dhuna policore e pretenduar gjatë tubimit të një dite më parë. Kjo çështje është kthyer në një tjetër pikë të revoltës së protestuesve, të cilët kërkojnë përgjegjësi për atë që ndodhi.

Studentët kanë bërë të ditur se nuk synojnë të ulen në dialog me kryeministrin Edi Rama, por kërkojnë dorëheqjen e tij. Në shenjë kundërshtimi, studentë nga fakultete të ndryshme kanë bojkotuar procesin mësimor dhe janë bashkuar me marshimin në kryeqytet.

Protestuesit paralajmërojnë se nuk do të tërhiqen nga lëvizja e tyre deri në largimin e kreut të qeverisë. Marshimi drejt Ministrisë së Arsimit shënon vijimin e mobilizimit studentor, i cili po mbështetet edhe nga qytetarë të tjerë.