“Revolucioni i Flamingove” nuk ndalet, hyn në ditën e 80-të

Protesta në Tiranë ka hyrë në ditën e 80-të, duke u shndërruar në një nga ciklet më të gjata të protestave të njëpasnjëshme të zhvilluara në kryeqytet gjatë muajve të fundit.

Prej 80 ditësh, qytetarë të shumtë janë mbledhur në zonat qendrore të Tiranës dhe pranë Kryeministrisë, duke vijuar kundërshtimin ndaj qeverisë dhe kërkesat për ndryshim politik. Protesta është bërë e njohur me emërtimin “Revolucioni i Flamingove”, simbol që është shoqëruar me tubimet gjatë gjithë kësaj periudhe.

Gjatë këtyre 80 ditëve, protesta ka marrë forma të ndryshme. Krahas grumbullimeve dhe marshimeve, qytetarët kanë vijuar organizimin e tubimeve të përditshme pranë institucioneve kryesore, duke mbajtur të pandryshuar mesazhin politik të protestës.

Një nga kërkesat kryesore të protestuesve mbetet dorëheqja e kryeministrit Edi Rama, ndërsa në qendër të thirrjeve janë edhe kërkesat për ndryshime politike dhe një tjetër drejtim të qeverisjes.

Edhe në ditën e 80-të, protestuesit vijojnë të mblidhen në rrugët e Tiranës, duke përsëritur mesazhet dhe kërkesat e artikuluara që prej nisjes së këtij cikli protestash.

Pjesë e lëvizjes kanë qenë për disa ditë edhe shqiptarë nga diaspora, të cilët iu bashkuan tubimeve në Tiranë, duke i dhënë një tjetër dimension mobilizimit dhe duke shtuar pjesëmarrjen në protestë.

“Revolucioni i Flamingove” vijon kështu prej 80 ditësh, ndërsa organizatorët dhe protestuesit kanë deklaruar se do të vazhdojnë tubimet dhe presionin publik për realizimin e kërkesave të tyre politike.