Rezerva e hidrokarbureve nuk do të administrohet më nga privatët

Rezerva e sigurisë së hidrokarbureve do të kalojë në administrimin e një subjekti shtetëror dhe nuk do të mbahet më nga operatorët privatë. Ndryshimi parashikohet në projektligjin e miratuar sot nga Këshilli i Ministrave, i cili sjell një riorganizim të mënyrës së ruajtjes dhe menaxhimit të rezervave.

Ministri i Energjisë dhe Infrastrukturës, Enea Karakaçi, tha pas mbledhjes së qeverisë se nisma synon të ndryshojë mënyrën e administrimit të rezervës së sigurisë dhe të rrisë garancinë për ruajtjen e saj.

“Mbajtja e rezervës së sigurisë së hidrokarbureve bëhet nga një subjekt shtetëror, duke i dhënë një garanci dhe siguri mbajtjes dhe përdorimit”, deklaroi Karakaçi.

Në bazë të projektligjit parashikohet krijimi i Autoritetit Kombëtar për Sigurinë e Hidrokarbureve, i cili do të ketë përgjegjësinë për ruajtjen dhe administrimin e rezervës.

Autoriteti i ri do të mundësojë edhe hedhjen e rezervës në treg në rast nevoje, në përputhje me përcaktimet ligjore.

Sipas ministrit Karakaçi, rezerva e sigurisë përbën një mekanizëm për garantimin e furnizimit me hidrokarbure në situata kur tregu përballet me mungesa.

Projektligji synon gjithashtu përafrimin e legjislacionit shqiptar me direktivat e Bashkimit Evropian lidhur me sigurinë e furnizimit me hidrokarbure.

Ndryshimi pritet të sjellë një model të ri të administrimit të rezervave strategjike, me përgjegjësinë kryesore që do t’i besohet një strukture shtetërore.