Rrëshqitje masive gurësh nga moti i keq në aksin Burrel-Skuraj

Rrëshqitje të mëdha gurësh janë regjistruar në aksin nacional Burrel-Skuraj, pas reshjeve të dendura të shiut që kanë përfshirë zonën gjatë orëve të fundit.

Situata problematike është krijuar pranë sektorit C, ku masa gurësh janë shkëputur nga shpati i malit dhe kanë përfunduar në trupin e rrugës, duke rrezikuar seriozisht qarkullimin e mjeteve. Për disa orë, njëri krah i aksit ka qenë i bllokuar, ndërsa ekipet e mirëmbajtjes kanë ndërhyrë për pastrimin dhe rikthimin e normalitetit.

Ky segment rrugor vijon të jetë ndër më problematikët, sidomos gjatë periudhave me reshje intensive, kur rrëshqitjet e gurëve bëhen të shpeshta dhe të paparashikueshme. Drejtuesit e mjeteve raportojnë vështirësi të konsiderueshme në qarkullim, për shkak të gurëve në asfalt, por edhe dëmtimeve të shumta në sipërfaqen e rrugës.

Autoritetet policore u bëjnë thirrje drejtuesve të tregojnë kujdes maksimal gjatë kalimit në këtë aks, duke theksuar se mungesa e sinjalistikës rrugore dhe e barrierave mbrojtëse e rrit ndjeshëm rrezikun për aksidente.

Një tjetër shqetësim serioz mbeten gropat në rrugë, të cilat e bëjnë edhe më të vështirë manovrimin për të shmangur gurët. Në disa segmente, një devijim i vogël nga korsia mund të rezultojë fatal, pasi rreziku për të dalë jashtë rruge dhe përfunduar në Liqenin e Shkopetit është real.