Rreziku i murtajës afrikane në Kroaci, autoritetet urdhërojnë vrasjen e 12,000 derrave

Autoritetet kroate kanë nisur sot një aksion të gjerë eutanazie, duke asgjësuar rreth 12,000 derra pas zbulimit të virusit shumë ngjitës dhe vdekjeprurës të murtajës afrikane të derrave (ASF) në fermat e lindjes së vendit.

Sipas Ministrisë së Bujqësisë, ky virus është i padëmshëm për njerëzit, por shkakton një sëmundje virale hemorragjike me një shkallë vdekshmërie që afrohet në 100% tek derrat dhe derrat e egër. Përhapja e virusit rrezikon eksportin e mishit të derrit, ndaj eutanazia parandaluese u konsiderua e domosdoshme.

Rreth 10,000 derra do të asgjësohen në fermën Sokolova, ndërsa rreth 1,600 të tjerë në një fermë tjetër të zonës, e njohur për shumë ferma derrash. Autoritetet kanë vendosur mbikëqyrje në 54 ferma me mbi 1,000 kafshë dhe po monitorojnë kufijtë e vendit.

Ministri i Brendshëm David Bozinović deklaroi se përhapja e virusit është shkaktuar “99% nga faktorë njerëzorë” dhe paralajmëroi se mund të ndërmerren masa edhe më radikale, përfshirë aktivizimin e ushtrisë në rast nevoje.

Kroacia ka mbi 873,000 derra në fermat e saj dhe eksporton më shumë se 285,600 me vlerë rreth 57 milionë euro, sipas statistikave kombëtare. Ende nuk ekziston një vaksinë e miratuar nga Bashkimi Evropian.