Sapo e zbuluam se si mbrohet qeveria e Ramës nga syri i keq

Përditësuar më 24 September 2025, 12:30

“Syri i keq” është një besëtytni që na shoqëron që nga fëmijëria dhe nuk është çudi nëse ke menduar ndonjëherë se ka njerëz që të marrin mësysh.

Duket se edhe qeveria e Edi Ramës nuk bën përjashtim nga këto besime. Nëse mendon se kryeministri mbrohet vetëm nga truproja dhe Garda e Republikës, duhet ta dish se rrethi i tij i mbrojtjes përfshin edhe një tufë me fije të ngjyrave të ndryshme: të kuqe, të zeza, të bardha, madje herë-herë edhe blu dhe të gjelbra.

Edi Rama – byzylykët që e mbrojnë nga energjitë negative

Rama njihet për besimin e tij në spiritualizëm dhe simbolika të ndryshme universale, prandaj nuk është çudi që e shohim shpesh me disa byzylykë në dorën e majtë. Në fotot e fundit ai ka disa shtresa fijesh të kuqe dhe të zeza, me nyje, një kombinim i njohur për mbrojtje nga mësyshi.

E kuqja simbolizon djegien e syrit të keq, fuqinë dhe vitalitetin

E zeza thith energjitë e liga

Nyjet mbyllin çdo rrugë që do të mund të merrte e keqja

Në një vend ku syri i keq përmendet më shpesh se inflacioni, Rama duket se ka ngritur një “gardë mistike” përreth vetes.

Ministret e besuara

Belinda Balluku, Zëvendëskryeministre dhe Ministre e Infrastrukturës, ka zgjedhur një stil më minimalist, por po ashtu me një byzylyk që kombinohet me fije të kuqe dhe të bardha. Kjo simbolizon mbrojtje, fillim të ri dhe qartësi në mendime.

Mirela Kumbaro, ministre e Edukimit, njihet si një nga gratë më jetëgjata në kabinetin e Ramës. Ajo përdor kombinimin e ngjyrës turkoaz dhe të zezës: turkoaz për qetësi dhe komunikim të qartë, ndërsa e zeza për mbrojtje nga energjitë intensive.

Ogerta Manastirliu, gjithashtu grua e besuar në kabinet, mban byzylykë të kuq dhe të bardhë për fat, shëndet dhe qartësi në mendime.

Erion Veliaj, kryetari i Bashkisë së Tiranës, mbart shumë “fije të shenjta”: të kuqe, të bardha, turkoaz dhe ngjyrat e ylberit, që sipas besimeve i sjellin balancë, diversitet dhe energji pozitive. Megjithatë, ky kombinim mistik nuk e ka shpëtuar nga sfidat ligjore që ka përballuar.

Elisa Spiropali – jashtë “klubit të fijes”

Ndryshe nga ministrat e tjerë, Elisa Spiropali nuk mban byzylykë. Kjo e veçon dhe, siç thuhet me humor, e bën të duket më pak “mbrojtëse” kundrejt mësyshit politik, duke qenë “jashtë klubi”.

Pse dorën e majtë?

Të gjithë byzylykët vendosen në dorën e majtë, sepse në spiritualizëm kjo dorë konsiderohet si pika ku thithen energjitë negative nga jashtë, duke i bllokuar që të mos depërtojnë në energjitë personale të mbajtësit.

Fija e kuqe në këtë kontekst është si një filtër mbrojtës nga negativiteti. Dhe duke qenë se politika është plot me intrigë dhe konkurencë, nuk është çudi që politikanët të përdorin këto simbole për mbrojtje.

A i mbrojtën byzylykët nga drejtësia?

Natyrisht që jo. Ligji nuk njeh spiritualitetin. Në traditën popullore shqiptare, byzylykët dhe fijet mund të të mbrojnë nga syri i keq dhe energjitë negative, por jo nga drejtësia. Siç u pa me rastin e Erion Veliajt, mbrojtja mistike nuk mjafton kundër hetimeve të SPAK dhe masave ligjore.

Dhe nga ana tjetër, nëse byzylyku është thjesht një objekt i blerë në treg, pa një ritual apo “dorë të bardhë” që ta lidhë me lutjen e duhur, atëherë ai është vetëm një dekor.

Në një sens tjetër, byzylykët mund të jenë edhe një “truk” për t’u dukur më afër popullit dhe për t’i treguar atij se edhe liderët kanë frikë nga syri i keq dhe duan mbrojtje.

Në përfundim, byzylykët mund të largojnë mësyshin e komshinjve dhe energjitë negative nga mbledhjet qeveritare, por nuk e fshijnë dot dosjen e drejtësisë.