SHBA mesazh botës: Mos bëni lojëra me presidentin Trump, nuk do ia dilni!

Sekretari amerikan i Shtetit, Marco Rubio, gjatë një konference të përbashkët për shtyp me presidentin Donald Trump, deklaroi se Nicolas Maduro nuk gëzon legjitimitet si president i Venezuelës, duke e cilësuar atë si një person të arratisur nga drejtësia amerikane.

Rubio theksoi se Maduro ka pasur mundësi reale për të shmangur përshkallëzimin e situatës, por sipas tij, ai i ka refuzuar të gjitha alternativat e ofruara dhe tashmë është përballur me pasojat. “Sot ai ka marrë mesazhin e qartë”, u shpreh Rubio.

Ai shtoi se deklaratat dhe veprimet e administratës amerikane përbëjnë një sinjal të fortë jo vetëm për Venezuelën, por për mbarë botën. Sipas Rubios, çdo përpjekje për të sfiduar apo testuar vendosmërinë e presidentit amerikan është e destinuar të dështojë.

Duke kujtuar akuzat e ngritura nga SHBA ndaj Madurros në vitin 2020, Rubio nënvizoi se ndaj tij ka ekzistuar edhe një shpërblim prej 15 milionë dollarësh. Ai theksoi se ka individë dhe regjime që përpiqen të konfiskojnë pasuri apo kompani amerikane dhe të luajnë politikisht me Uashingtonin, por paralajmëroi se administrata aktuale nuk toleron veprime të tilla.

“Ky është një president që vepron, jo që bën lojëra. Kur thotë se do ta zgjidhë një problem, ai e bën. Mesazhi për botën është i qartë: mos provoni të luani me presidentin aktual të Shteteve të Bashkuara, sepse nuk do t’ia dilni mbanë”, përfundoi Rubio.