Shefi i Policisë flet për vrasjen në Kurbin: Objektiv ka qenë personi i plagosur! Po hetojmë konfliktet e tij

Zv.Drejtori i Krimeve  në Lezhë, Gentian Berberi, i cili ka shkuar në fshatin Gurëz të Kurbinit ku ka ndodhur një vrasje dhe një plagosje këtë mëngjes, tha për mediat se objekti i atentatit ka qenë personi i plagosur, Ardian Gjeloshaj, rreth 51 vjeç. Gjeloshaj ndodhet në spital tashmë jashtë rrezikut për jetën, kurse ekonomisti i firmës, Selman Mihana, rreth 70 vjeç, ka ndërruar jetë nga plumbat e autorëve.

Dyshohet se është qëlluar me automatik, tha drejtuesi i Policisë dhe tashmë ka nisur kërkimi i autorëve dhe hetimet për shkakun e vrasjes dhe tentativës për vrasjen.

Berberi tha: “Sot rreth orës 7 është njoftuar se në ambientin ku ndodhemi është qëlluar me armë zjarri, ku është tentuar të vritet shtetasi me iniciale A.Gj i moshës 51 vjeç. Si pasojë e të shtënave ka humbur jetën një shtetas tjetër me iniciale S.M. rreth 75 vjeç. Është marrë menjëherë reagimi i forcave të Policisë. Është ngritur një grup i posaçëm nga prokuroria e Lezhës. Kemi ndihmën e Departamentit të Policisë Kriminalë me ekspertë të fushës.

Jemi në veprimet e para për sqarimin e rrethanave. Dyshohet paraprakisht se është qëlluar me automatik. Ka të dhënave për lëvizje të autorëve me një mjet. Jemi në momentet e para dhe nuk mund të jap detaje të tjera.

Po hetojmë të gjithë konfliktet dhe mosmarrëveshjet që dyshohet që ka peRsoni që është tentuar të vritet. Objektivi i atentatit është personi që ka mbetur i plagosur. Fatmirësisht është në gjendje të mirë, ndodhet nën kujdesin e mjekëve.”/ar.sh/SYRI.NET

Njoftimi paraprak i Policisë 

“Rreth orës 07:00, është marrë njoftim se në fshatin Gurez, Kurbin, në ambientet e një firme ku përpunohen inerte, në rrethana ende të paqarta është vrarë me armë zjarri shtetasi Selman Mihana, rreth 70 vjec, ekonomist i firmës, si dhe është plagosur pronari  shtetasi Ardian Gjeloshi, rreth 51 vjeç, i cili është transportuar në spital për ndihmë mjeksore.

Shërbimet e Policisë Vendore kanë shkuar në vendngjarje, është rrethuar zona dhe vijon kontrolli i territorit.

Ndërkohë është ngritur një grup i posaçëm hetimor nën drejtimin e Prokurorisë për zbardhjen e rrethanave të ngjarjes, identifikimin dhe kapjen e autorit/ve.

Në ndihmë të Policisë vendore kanë shkuar forcat Kombëtare të Sigurisë dhe Forcat Speciale Renea. Në një moment të dytë do të ketë njoftim më të plotë në lidhje me ngjarjen.”