Shehaj mbetet pa seli, qeveria dhe hipotekat e lënë ‘mes 4 rrugëve’

Partia “Mundësia”, e përfaqësuar në Kuvend nga deputetët Agron Shehaj dhe Erald Kapri, i është drejtuar institucioneve shtetërore me kërkesën për të përfituar një godinë për selinë e saj politike.

Kërkesa mbështetet te parashikimet e ligjit për partitë politike, sipas të cilave subjektet që plotësojnë kushtet e përcaktuara, përfshirë kalimin e pragut prej 1%, mund të përfitojnë ambiente shtetërore për ushtrimin e aktivitetit të tyre politik.

“Mundësia” aktualisht është një parti parlamentare dhe, në bazë të këtij statusi dhe rezultatit të arritur në zgjedhje, pretendon të drejtën për një ambient ku të vendosë selinë e saj zyrtare.

Megjithatë, kërkesa për një godinë shtetërore duket se përballet me një pengesë praktike.

Sipas informacionit të përcjellë nga institucionet përgjegjëse për pronat, nuk rezulton të ketë aktualisht një pasuri të lirë shtetërore që mund t’i vihet në dispozicion partisë.

Kjo e lë të hapur çështjen se ku do të vendoset selia zyrtare e “Mundësisë” dhe nëse partia do të detyrohet të gjejë një ambient në tregun privat, përmes marrjes me qira.

Në këtë situatë, mbetet për t’u parë se si do të procedohet me kërkesën e deputetëve Agron Shehaj dhe Erald Kapri dhe nëse institucionet do të identifikojnë një pronë që plotëson kriteret ligjore për t’u përdorur si seli politike.

Çështja e ambienteve për partitë politike ka qenë prej vitesh pjesë e diskutimeve mbi mënyrën se si shteti mbështet subjektet politike që plotësojnë kriteret e përcaktuara në ligj.