Shijak/ Zbardhet dëshmia e djalit të oficerit të Policisë: Më qëlluan përballë me kallashnikov!

Hetimet e deritanishme të Policisë së Durrësit në lidhje me atentatin e ndodhur mesditën e së shtunës në afërsi të Shijakut, nuk kanë dhënë rezultat, duke bërë që grupi i hetimit të mendojë edhe pistën e një ngjarjeje të sajuar për arsye ende të paqarta nga 31-vjeçari.

Si Orlando Paplekaj (objektivi i atentatit të mbetur në tentativë), ashtu edhe babai i tij, kanë hedhur poshtë mundësinë që të kenë konflikte të hapura me persona të tjerë. Grupi i hetimit, që shkoi në vendin e ngjarjes për të kryer veprimet e para dhe për të grumbulluar prova materiale, tha për gazetën se kamionçina nuk është prekur nga asnjë plumb, ndërkohë që në vendin e ngjarjes u gjetën tri gëzhoja arme automatik tip kallashnikov.

“Nëse do të donin të qëllonin mbi objektivin, e kishin shumë të thjeshtë. Ishin vetëm katër pesë metra afër dhe, mbi të gjitha, me këtë afërsi, asnjë plumb nuk e ka goditur kamionçinën. Ai (Papleka) thotë se më bllokuan rrugën dhe më qëlluan drejt, por kjo nuk na rezulton. Ne po hetojmë në disa pista, si: konflikte të tij apo të të atit që punon si polic te burgu. Por si djali, ashtu edhe i ati, thonë se s’kanë konflikte të hapura. Në këto kushte, po hetojmë edhe pistën e tretë: atë të sajimit të ngjarjes për arsye ende të paqarta, por që mund t’i shërbejë këtij individi ndoshta edhe për të kërkuar azil”, thanë burime nga grupi i hetimit.

I RIU RIMERRET NË PYETJE

Policia ka rimarrë në pyetje Orlando Paplekajn, i cili ishte shënjestra e autorëve. Paplekaj ka dëshmuar në Polici se ka qenë duke shpërndarë bombola gazi dhe oksigjeni me kamionçinë, kur një mjet tip “Golf”, pasi e ka ndjekur atë për 10 metra, pasagjeri që ndodhej në automjet, ka nxjerrë armën nga një thes dhe ka qëlluar në drejtim të tij.

Ai thotë se nuk i njeh autorët dhe nuk ka dijeni pse i kanë bërë atentatin.

“Kam qenë duke shpërndarë bombola gazi me kamionçinë, kur një mjet tip ‘Golf’ më ka ndjekur rreth 10 metra dhe pastaj kanë qëlluar. Pasagjeri i mjetit tip ‘Golf’ e ka nxjerrë armën nga një thes dhe ka qëlluar. Nuk i njoh atentatorët, nuk e di pse kanë qëlluar”, mësohet të ketë thënë Paplekaj.

Orlando Paplekaj është me orgjinë nga Tropoja dhe jeton në Durrës prej 13 vitesh, së bashku me familjen, ndërsa babai i tij punon në Burgun e Durrësit. Ai kishte pak kohë që kishte nisur punën e re, atë të shpërndarjes së bombolave të oksigjenit për llogari të një kompanie, ndërsa më herët ka punuar për disa kohë edhe si roje në disa kompani.