Aktivistët: U thirr policia për të na larguar

Aktivistë dhe përfaqësues të komunitetit të prindërve janë përballur sot me refuzimin e drejtueses së Shkolla 9‑vjeçare Fan Noli për të lejuar vendosjen e një stoli përkujtimor në nder të Martin Cani, 14-vjeçarit që humbi jetën pas një konflikti me një bashkëmoshatar pranë shkollës.

Sipas aktivistëve, hyrja e institucionit është bllokuar me argumentin se mungon leja për vendosjen e stolit, ndërkohë që ata pretendojnë se iniciativa është miratuar në mbledhjen e Këshilli Bashkiak i Tiranës dhe ka marrë dakordësinë edhe nga zyra arsimore.

Aktivistja Sideorela Vatnikaj shprehu zhgënjimin për situatën, duke deklaruar se drejtoresha e shkollës nuk ka dalë për të komunikuar me ta, por ka thirrur policinë për t’i larguar nga ambientet e jashtme të institucionit.

Sipas saj, në vendngjarje kanë qenë të pranishëm edhe prindërit e Martin Canit, të cilët – siç u shpreh ajo – përveç dhimbjes për humbjen e djalit, po përballen edhe me pengesa burokratike për një akt simbolik përkujtimi.

“Jemi shumë të zhgënjyer dhe të lënduar që kjo çështje po zvarritet. Na është thënë se drejtoresha nuk ka dalë asnjë moment, por ka thirrur policinë për të na larguar me forcë. Nuk na është dhënë asnjë arsye pse nuk duhet të vendoset stoli, ndërkohë që Këshilli Bashkiak dhe zyra arsimore e kanë miratuar,” u shpreh Vatnikaj.

Ajo shtoi se drejtuesja e shkollës, si përgjegjëse për sigurinë e nxënësve, duhej të ishte ndër të parat që do të mbështeste një akt simbolik që, sipas saj, do të shërbente edhe për ndërgjegjësimin e fëmijëve kundër dhunës.

Ngjarja tragjike ku humbi jetën Martin Cani ndodhi më 18 nëntor 2024, rreth 200 metra larg shkollës “Fan Noli” në Tiranë. Konflikti mes dy adoleshentëve kishte nisur disa ditë më parë brenda ambienteve të shkollës për motive të dobëta dhe, megjithëse dukej se ishte shuar, u rikthye sërish pak para incidentit fatal.