Reperi Gold AG, (Arian Agushi) është shoqëruar ditën e sotme në polici, për shkak të këngës së tij të fundit, me motive patriotike. Bëhet fjalë për këngën ‘Shkronjat e arta’, teksti i së cilës është reagim ndaj ish-këshilltarit të kryeministrit Kurti, Shkelzen Gashit.
Kënga erdhi pak ditë pasi Gashi foli për krimet e Luftës së Kosovës, që sipas tij, i kanë kryer pjesëtarë të UCK-së. Kësisioj reperi Gold AG i ka kushtuar një këngë, që sipas Policisë, përmban nxitje të përçarjes.
Zëdhenësja e Policisë për rajonin e Prishtinës, Flora Ahmeti, ka thënë për mediat kosovare se Gold AG sot u intervistua nga policia lidhur me këtë këngë.
“Sot në koordinim me Prokurorinë themelore në Prishtinë, është iniciuar rast Nxitja e përqarjes dhe mosdurimit. Lidhur me këtë rast është intervistuar viktima dhe po ashtu edhe i dyshuari. I dyshuari pas intervistimit me vendim të prokurorit është liruar, rasti shkon në procedurë të rregullt”, tha Ahmeti
