Shpërthim me tritol makinës në Tiranë, zbulohet se kujt i përkiste

Një shpërthim me lëndë plasëse ka tronditur orët e para të mëngjesit në zonën e Selitës së Vogël, ku një automjeti i parkuar në oborrin e një banese iu vendos tritol. Ngjarja ka ndodhur rreth orës 03:20 të datës 19 dhjetor 2025, duke shkaktuar panik në zonë, por fatmirësisht vetëm dëme materiale.

Është zbuluar edhe identiteti i poseduesit të mjetit. Bëhet fjalë për Dritan Jano, rreth 39 vjeç.

Policia bën me dije se automjeti ndodhej i parkuar në ambientet e banesës së tij në momentin e shpërthimit. Menjëherë pas ngjarjes, në vendngjarje ka mbërritur grupi hetimor, i cili po punon për zbardhjen e plotë të rrethanave dhe për identifikimin e autorit ose autorëve të përfshirë.

Autoritetet nuk kanë dhënë ende detaje mbi pistat e hetimit, ndërsa pritet që verifikimet të vijojnë për të hedhur dritë mbi motivet e këtij atentati me tritol.