Shqipëria merr dronë dhe artileri të sofistikuar nga Izraeli

Shqipëria ka firmosur një marrëveshje të re strategjike me Izraelin për blerjen e sistemeve moderne të artilerisë dhe dronëve ushtarakë. Lajmin e ka bërë publik gazeta izraelite Haaretz, e cila citon burime zyrtare dhe detaje nga marrëveshja e nënshkruar mes dy qeverive.

Sipas raportimit të gazetarit Oded Yaron, kompania izraelite e mbrojtjes Elbit Systems do të furnizojë ushtrinë shqiptare me:

• Topa ATMOS 155 mm të montuar në kamionë,

• Mortaja SPEAR 120 mm,

• si dhe dronë taktikë Magni-X dhe Thor, të përdorur aktualisht nga ushtritë britanike dhe austriake.

Edhe pse vlera e kontratës nuk është bërë publike, sipas çmimeve ndërkombëtare, një sistem i vetëm artilerie mund të kushtojë deri në 5 milionë dollarë.

SPEAR 120 mm

Në marrëveshje përfshihet edhe bashkëpunimi me kompaninë shtetërore shqiptare “KAYO”, e krijuar për zhvillimin e industrisë kombëtare të mbrojtjes. Fillimisht, Shqipëria do të marrë dhjetë dronë, ndërsa më pas Elbit do të ndihmojë në ngritjen e linjave të prodhimit të dronëve dhe montimit të artilerisë në territorin shqiptar.

Haaretz thekson se kjo marrëveshje është një hap tjetër në forcimin e bashkëpunimit të sigurisë mes Tiranës dhe Tel Avivit, duke vijuar marrëveshjen e mëparshme të nënshkruar në korrik për bashkëpunim mbrojtës.

ATMOS 155 mm

Dronët Magni-X janë të vegjël, mund të mbahen në shpinë dhe kanë aftësi tërësisht autonome, që u mundësojnë fluturimin edhe në kushte të ndërprerjes së sinjalit GPS. Ata mbajnë ngarkesë deri në 1.5 kg dhe qëndrojnë në ajër për 60 minuta pa ndërprerje.

Magni-X

Ndërsa modeli Thor ka kapacitet peshe deri në 15 kg dhe mund të pajiset me sistemin “TerminaTHOR”, që lejon hedhjen e deri në pesë mini-bombave nga ajri.

Financimi dhe sigurimi i marrëveshjes do të mbulohen nga ASHRA, kompania shtetërore izraelite për sigurimin e rreziqeve të tregtisë së jashtme.