File Bulku: Nuk isha në protestë, po shkoja në shtëpi

Një episod i fortë nga protesta e një dite më parë ka rikthyer debatin publik, pasi një nënë së bashku me djalin e saj në spektrin autik u prekën nga spërkatja me ujë me piper gjatë tensioneve me policinë.

Pas ngjarjes, ajo rrëfeu se nuk kishte qenë pjesë e protestës, por ishte duke u kthyer në shtëpi pas përfundimit të terapisë së djalit. Sipas saj, ndërhyrja e policisë i kapi në momentin kur po largoheshin nga zona.

“Isha duke ikur për në shtëpi. Vetëm këtë kërkoja. Na hodhën piper në sy dhe ujë. Nuk isha pjesë e protestës, kisha qenë te terapia e djalit. Turp të kenë”, u shpreh ajo, duke përshkruar momentet e përjetuara.

Megjithatë, kryeministri Edi Rama në reagimin e tij ia atribuoi përgjegjësinë protestuesve. Ai deklaroi se nëna dhe fëmija ishin marrë në protestë për t’u përdorur si simbol, duke akuzuar organizatorët për manipulim dhe shfrytëzim të situatës.

Në reagimin e tij, Rama përdori një gjuhë të ashpër ndaj protestuesve, duke i cilësuar si persona që përdorin qytetarët si “mburojë” për përballjen me policinë, ndërsa shtoi se qeveria ka rritur mbështetjen për fëmijët në spektrin autik dhe familjet e tyre.

Nga ana tjetër, nëna, File Bulku, i qëndroi deklaratës së saj fillestare, duke këmbëngulur se nuk kishte lidhje me protestën dhe se ishte rastësisht në zonë gjatë kthimit për në banesë.

Ngjarja ka ngjallur reagim të gjerë në opinionin publik. Historia e saj dhe e djalit ka prekur shumë qytetarë, të cilët në një fushatë online arritën të mbledhin rreth 151 mijë dollarë në pak orë për t’i ardhur në ndihmë familjes.

Debati u përfshi edhe në arenën politike, ku kreu i Partisë Demokratike, Sali Berisha, publikoi deklaratën e kryeministrit të shoqëruar me videon e nënës, duke reaguar ashpër ndaj tij.