Shqiptarët nuk dorëzohen, sot protesta e 38 kundër sistemit politik

Protesta qytetare para godinës së Kryeministrisë hyn sot në ditën e saj të 38-të, duke konfirmuar një nga mobilizimet më të gjata dhe më të qëndrueshme të viteve të fundit në vend. Për më shumë se një muaj, qytetarë nga Tirana, rrethet dhe diaspora kanë mbajtur të pandërprerë prezencën e tyre në bulevard, duke e kthyer këtë lëvizje në një simbol rezistence ndaj qeverisë.

Edhe këtë pasdite pritet një tjetër tubim, ku protestuesit do të vijojnë aksionin e tyre të përditshëm. Ajo që fillimisht nisi si një reagim kundër projektit në Zvërnec, tashmë është shndërruar në një lëvizje më të gjerë politike dhe shoqërore, me fokus të qartë: largimin e kryeministrit Edi Rama dhe kërkesën për ndryshim të sistemit politik në vend.

Gjatë tubimit të një dite më parë, u rikthyen sërish thirrjet e forta të protestuesve, si “Rama jepe dorëheqjen”, “Rama ik”, “Rama në burg, Berisha në burg”, “Ju erdhi fundi”, “Revolucion”, “Shqipëri e re” dhe “Atdheu është i yni”. Organizatorët kanë theksuar se protesta do të vazhdojë pa ndërprerje deri në realizimin e kërkesave kryesore.

Në podium u ngjitën disa qytetarë dhe aktivistë, të cilët ndanë mesazhe dhe qëndrime të forta. Mes tyre, Nëna Liza rikujtoi protestat e “5 Majit”, duke kërkuar dorëheqjen e kryeministrit, ndërsa një tjetër pjesëmarrëse bëri apel për ruajtjen e karakterit paqësor të lëvizjes, duke e cilësuar shmangien e dhunës si thelbësore për arritjen e objektivave.

Një nga momentet më prekëse të protestës ishte fjala e nënës së aktivistit Arbër Lleshaj. Ajo foli për arrestimin dhe, sipas saj, dhunimin e të birit gjatë protestave të javës së kaluar, duke theksuar se kjo ngjarje e ka forcuar edhe më shumë vendosmërinë e saj për të qenë çdo ditë në shesh.

Organizatorët kanë konfirmuar se tubimet do të vijojnë edhe në ditët në vazhdim. Ndërkohë, qytetarët pritet të rikthehen sërish këtë pasdite për të vazhduar protestën në ditën e saj të 38-të, duke mbajtur të gjallë presionin ndaj qeverisë.