Nën akuza, ish-zv.drejtoresha e QSUT, mjekë e specialistë

Dërgonin pacientët e Onkologjikut në klinika private dhe prishën kobalto-terapinë

Një çështje e rëndë që prek drejtpërdrejt sistemin shëndetësor ka përfunduar në fazën e gjykimit. Prokuroria e Tiranës ka mbyllur hetimet dhe ka dërguar në gjyq gjashtë persona, mes tyre drejtues, mjekë dhe administratorë të lidhur me shërbimin onkologjik në QSUT.

Të pandehurit akuzohen për “Shpërdorim detyre”, “Fshehje të të ardhurave” dhe “Tregtim të mallrave kontrabandë”, ndërsa hetimi ka nxjerrë në pah një skemë shqetësuese që prek trajtimin e pacientëve me sëmundje tumorale.

Sipas organit të akuzës, pacientët që kërkonin shërbim në spitalin publik nuk merrnin trajtimin e duhur, por orientoheshin qëllimisht drejt klinikave private, ku paguanin tarifa të larta për ndërhyrje dhe trajtime që në fakt duhet të ofroheshin falas në sistemin publik. Në këtë skemë, disa prej të përfshirëve dyshohet se përfitonin financiarisht në formë përqindjeje.

Në qendër të hetimit është edhe roli i koordinatorëve dhe administratorëve, të cilët, sipas provave, ndërhynin në listat e pritjes duke përzgjedhur pacientë dhe duke i devijuar drejt strukturave private, në kundërshtim me procedurat ligjore.

Një tjetër element alarmues lidhet me një pajisje të rëndësishme mjekësore për trajtimin e kancerit – aparatura e Kobalto-Terapisë. Hetimet kanë zbuluar se kjo pajisje, e mbërritur në Shqipëri që në vitin 2021, nuk është vënë asnjëherë në funksion, pasi nuk janë përmbushur kushtet teknike të sigurisë. Konkretisht, nuk është ndërtuar bunkeri i posaçëm antiradioaktiv, i kërkuar sipas standardeve ndërkombëtare.

Pavarësisht kësaj, pajisja është instaluar në ambiente të papërshtatshme, pranë kabinetit të radiologjisë, duke krijuar rrezik potencial për personelin mjekësor për shkak të rrezatimeve. Kjo situatë ka sjellë jo vetëm mungesë shërbimi për pacientët, por edhe dëm ekonomik për institucionin.

Në hetim është përfshirë edhe aktiviteti i një klinike private, ku janë konstatuar shkelje të rënda financiare, përfshirë moslëshimin e faturave tatimore dhe punësimin informal të mjekëve.

Po ashtu, një administrator farmaceutik akuzohet për futjen në treg të barnave kontrabandë, konkretisht një medikament pa pullë sigurie dhe me elementë identifikues të dëmtuar.

Ndërkohë, për një prej mjekëve të përfshirë, çështja është veçuar dhe i është referuar për kompetencë SPAK, për hetim mbi dyshimet për korrupsion pasiv.

Ky rast pritet të jetë një test i rëndësishëm për drejtësinë, pasi prek një nga sektorët më të ndjeshëm – shëndetësinë – dhe përfshin dyshime serioze për abuzim me detyrën në kurriz të pacientëve.