Sot dëgjohet dëshmitari i tretë i mbrojtjes së Thaçit në Hagë

Sot po vijon procesi gjyqësor ndaj ish-presidentit Hashim Thaçi në Dhomat e Specializuara në Hagë, ku mbrojtja do të paraqesë dëshminë e një shtetasi britanik. Ai është i treti në listën e dëshmitarëve të propozuar nga ekipi mbrojtës, pas paraqitjes së James Rubin dhe Paul Williams javën e kaluar.

Rubin, ish-ndihmësi i sekretarit të shtetit amerikan, theksoi se Thaçi nuk kishte autoritet për të vendosur veprime brenda UÇK-së, duke quajtur akuzat ndaj tij të pabaza. Po ashtu, Williams foli për rolin e Thaçit gjatë negociatave të Rambujesë dhe theksoi se ai nuk kishte kontroll mbi vendimet kryesore.

Seanca e sotme, që ka nisur në orën 09:00, është pjesë e procesit ku mbrojtja do të paraqesë gjithsej 11 dëshmitarë. Pas përfundimit të mbrojtjes më 14 nëntor 2025, do të paraqiten edhe deklaratat përfundimtare mbi ndikimin e krimeve të pretenduara ndaj viktimave të luftës në Kosovë.

Aktakuza ndaj Hashim Thaçit dhe katër ish-zyrtarëve të tjerë u konfirmua më 26 tetor 2020.