Dyshohet se trafikoi 60.7 tonë kokainë drejt Europës

Prokuroria e Posaçme kundër Korrupsionit dhe Krimit të Organizuar ka përmbyllur hetimet për procedimin penal nr. 187/2023, që lidhet me aktivitetin e një organizate kriminale me shtrirje ndërkombëtare, e dyshuar për trafikimin e sasive të mëdha të kokainës nga Amerika e Jugut drejt vendeve të Bashkimit Europian.

Më 5 nëntor 2026, SPAK ka depozituar në Gjykatën e Posaçme të Shkallës së Parë kërkesën për gjykimin e 16 personave, mes të cilëve edhe Franc Gergely, i njohur si Franc Çopja, dhe Ervis Çela, të cilët hetuesit i identifikojnë si dy prej figurave kryesore drejtuese të kësaj strukture.

Sipas rezultateve të hetimit, organizata dyshohet se ka funksionuar të paktën gjatë periudhës 2019–2021, me një organizim vertikal dhe ndarje të përcaktuar detyrash. Rrjeti kishte krijuar lidhje me grupe kriminale në Paraguaj dhe Brazil dhe kontrollonte disa etapa të aktivitetit, nga sigurimi i kokainës në vendet e prodhimit deri te transportimi, nxjerrja nga portet europiane dhe shpërndarja në tregjet e destinacionit.

16 persona të dërguar për gjykim, akuzat ndaj të pandehurve

Në kërkesën e depozituar në gjykatë përfshihen 16 persona, ndaj të cilëve SPAK ka ngritur akuza të ndryshme, në varësi të rolit që dyshohet se kanë pasur në veprimtarinë e organizatës.

Në grupin e parë bëjnë pjesë Ervis Çela, Franc Gergely (Franc Çopja), Fadil Balla (Julian Balla), Riza Çela, Ardjan Çela, Maringlen Mullaj, Petrit Lakatos (Petrit Sulejmani), Renato Musaku, Gert Çerma, Marenglen Kamami dhe Soni Pepa (Vilson Pepa).

Për këta persona, prokuroria ka ngritur akuza për trafikim të narkotikëve në kuadër të organizatës kriminale, pjesëmarrje dhe organizim të strukturave kriminale, si dhe pastrim të produkteve të veprës penale.

Ndërkohë, Albin Çela, Elidon Çela dhe Denis Daja akuzohen për pastrim parash, organizatë kriminale dhe kryerje të veprave penale në kuadër të saj.

Dy emrat e tjerë, Ditjon Pepa dhe Kujtim Gjyla, janë marrë të pandehur për pastrim të produkteve të veprimtarisë kriminale, të kryer në bashkëpunim.

Përveç këtyre akuzave, Riza Çela dhe Albin Çela do të përballen gjithashtu me akuzën e ndërtimit të paligjshëm, të kryer në bashkëpunim dhe për qëllime fitimi.

Si funksiononte rrjeti ndërkombëtar i kokainës

Hetimi i SPAK është mbështetur në një numër të konsiderueshëm provash, mes të cilave komunikimet e zbërthyera në platformat e enkriptuara SkyECC dhe EncroChat, materialet fotografike të shkëmbyera mes personave të dyshuar, si dhe informacionet e siguruara përmes bashkëpunimit me autoritetet e huaja.

Nga analiza e këtyre të dhënave, prokuroria ka arritur në përfundimin se organizata kishte ndërtuar një zinxhir të mirëorganizuar ndërkombëtar, me lidhje në Amerikën e Jugut dhe në disa shtete europiane.

Në vendet e origjinës sigurohej lënda narkotike, organizohej financimi dhe transportimi i saj, ndërsa në Europë kryheshin operacionet për pritjen e ngarkesave, nxjerrjen e tyre nga portet, magazinimin dhe shpërndarjen me shumicë.

Destinacionet ku dyshohet se përfundonte kokaina përfshinin Gjermaninë, Spanjën, Belgjikën, Holandën, Mbretërinë e Bashkuar dhe Italinë.

Një element i rëndësishëm i skemës ishte përdorimi i kompanive tregtare që ushtronin aktivitet të ligjshëm import-eksporti. Përmes tyre, ngarkesat me kokainë dyshohet se kamufloheshin mes produkteve industriale dhe mallrave të zakonshme, duke u transportuar me kontejnerë në linjat e tregtisë ndërkombëtare.

Komunikimet e zbardhura nga hetuesit përmbajnë biseda në gjuhën shqipe dhe spanjolle, ku diskutoheshin sasitë e drogës, çmimet, dërgesat, mënyrat e transportimit dhe lëvizja e parave. Fotografitë e shkëmbyera mes personave nën hetim paraqesin produkte dhe ngarkesa që, sipas prokurorisë, shërbenin për të mbuluar transportin e lëndës narkotike.

Franc Çopja dhe Ervis Çela, dy drejtuesit e identifikuar nga SPAK

Në qendër të hetimit qëndrojnë Franc Gergely, i njohur si Franc Çopja, dhe Ervis Çela. Sipas SPAK, të dy kanë pasur funksione bashkëdrejtuese, por me përgjegjësi të ndryshme në organizimin e aktivitetit kriminal.

Ervis Çela dyshohet se kishte në ngarkim sigurimin e kokainës në vendet e origjinës. Ai mbante kontaktet me furnizuesit në Amerikën Latine, negocionte çmimet dhe cilësinë e lëndës narkotike, siguronte financimin për blerjen e saj dhe koordinonte transportin drejt Paraguait.

Përgjegjësitë e tij përfshinin gjithashtu grumbullimin dhe magazinimin e kokainës, përgatitjen e ngarkesave për eksport dhe organizimin e transportit drejt pikave të nisjes.

Në anën tjetër, Franc Gergely dyshohet se mbulonte kryesisht financimin dhe organizimin e fazave të mëtejshme të trafikut. Sipas hetimit, ai koordinonte transportin ndërkombëtar, siguronte kompanitë që porosisnin mallrat e ligjshme të përdorura për kamuflimin e kokainës dhe organizonte nxjerrjen e ngarkesave nga portet europiane.

Vëmendje e veçantë i është kushtuar portit të Anversës në Belgjikë, ku, sipas komunikimeve të analizuara nga SPAK, Gergely kishte kontakte me persona të lidhur me strukturat doganore dhe të sigurisë portuale.

Prokuroria e përshkruan bashkëpunimin mes dy të dyshuarve si një marrëdhënie të vazhdueshme koordinimi, ku secili mbulonte një hallkë të rëndësishme të zinxhirit. Ndërsa Çela merrej me sigurimin e kokainës në burim, Gergely ishte i përfshirë në financimin, transportimin drejt Europës, nxjerrjen nga portet dhe administrimin e shpërndarjes.

Nga Bolivia drejt porteve europiane, kokaina fshihej në mallra industriale

Një prej elementeve më të rëndësishme të skemës së zbardhur lidhet me mënyrën se si sigurohej dhe transportohej lënda narkotike nga Amerika e Jugut.

Sipas komunikimeve të administruara nga SPAK, laboratorët e prodhimit të kokainës në rajonin e Andeve, veçanërisht në Bolivi, identifikoheshin nga personat e përfshirë me termin “kuzhina”.

Në këtë fazë, Ervis Çela dyshohet se kishte një rol qendror në sigurimin e sasive të kërkuara dhe koordinimin me furnizuesit.

Kokaina transportohej fillimisht nga zonat e prodhimit drejt Paraguait. Për këtë qëllim, sipas hetimit, përdoreshin edhe avionë të vegjël, të cilët kryenin transportin nga Bolivia drejt zonave rurale të Paraguait.

Në komunikimet e zbardhura përmenden ngarkesa që arrinin deri në 500 kilogramë. Pas mbërritjes në Paraguaj, lënda narkotike transferohej në mjete të tonazhit të rëndë, për t’u dërguar drejt ambienteve të magazinimit dhe përgatitjes për eksport.

Në këtë proces dyshohet se përdoreshin edhe shoqëritë tregtare P.T.S.A. dhe E.P.S.R.L., në pronësi të shtetasit paraguajan me inicialet D.I.B.C.

Përmes kësaj infrastrukture, kokaina ripaketohej dhe fshihej në ngarkesa me produkte të ligjshme, si stuko patinimi, bojëra dhe materiale të tjera industriale. Kjo mënyrë veprimi synonte t’i jepte transportit të lëndës narkotike pamjen e një aktiviteti të zakonshëm tregtar.

Hetimi ka zbuluar edhe kostot e përllogaritura për këtë fazë të operacionit. Sipas të dhënave të administruara:

• Blerja e një kilogrami kokainë kushtonte rreth 4.100–4.200 dollarë, çmim që përfshinte transportin deri në portin e Villetës në Paraguaj.

• Për ngarkimin në anije paguheshin edhe rreth 1.300 dollarë për kilogram, shumë që, sipas hetimit, përdorej si ryshfet për kalimin e ngarkesës.

Në komunikimet mes personave të përfshirë, termi “hipja” përdorej për procesin e ngarkimit në anije, ndërsa “dalja” i referohej nxjerrjes së kokainës nga porti europian i destinacionit.

Rruga e kokainës: nga Paraguaji në Gjermani, Belgjikë, Spanjë dhe Holandë

Për transportimin drejt Europës dyshohet se përdorej një kombinim i rrugëve lumore dhe atyre detare.

Ngarkesat niseshin nga porti i Villetës në Paraguaj dhe përshkonin korridorin lumor Paraguaj–Paraná, deri në portin e Buenos Airesit në Argjentinë. Aty kontejnerët transferoheshin në anije transoqeanike, të cilat vijonin udhëtimin drejt porteve europiane.

Ndër destinacionet e identifikuara nga hetuesit janë Hamburgu në Gjermani, Anversa në Belgjikë, Barcelona në Spanjë dhe Roterdami në Holandë.

Një tjetër element i skemës ishte ndryshimi i destinacionit të kontejnerëve gjatë lundrimit. Sipas SPAK, kjo bëhej për t’i orientuar ngarkesat drejt porteve ku ishin krijuar kushtet për dorëzimin dhe nxjerrjen e lëndës narkotike.

Në këtë fazë, Franc Gergely dyshohet se kishte krijuar kontakte që mundësonin koordinimin e operacioneve në portin e Anversës. Për nxjerrjen e kokainës, kostoja llogaritej në rreth 15% të ngarkesës dhe, sipas hetimit, pagesa kryhej zakonisht duke dorëzuar një pjesë të vetë lëndës narkotike.

Pas nxjerrjes nga portet, Holanda shërbente si një prej qendrave kryesore të magazinimit dhe shpërndarjes me shumicë. Kjo fazë dyshohet se koordinohej nga Gergely, i cili merrej me përcaktimin e sasive dhe çmimeve, organizimin e paketimit dhe transportit drejt vendeve të tjera europiane, si dhe administrimin e pagesave.

Hawala dhe token, mekanizmat e përdorur për transferimin e parave

Përmasat e aktivitetit kërkonin një sistem të veçantë financiar, përmes të cilit të ardhurat nga trafikimi të qarkullonin mes vendeve të ndryshme pa u ekspozuar në kanalet tradicionale bankare.

Sipas hetimit, organizata përdorte mekanizma informalë të transferimit të vlerave monetare, të njohur si “Hawala”, si dhe kode identifikuese të quajtura “token”.

Sistemi Hawala mundëson transferimin e parave përmes një rrjeti ndërmjetësish në shtete të ndryshme, pa qenë e nevojshme lëvizja fizike e shumave apo përdorimi i transfertave të zakonshme bankare.

Ndërsa token shërbente si një kod identifikues për të konfirmuar dhe verifikuar dorëzimin e shumave monetare mes personave të përfshirë.

Në komunikimet e analizuara përmenden si pika të këtij rrjeti financiar Paraguaji, Bolivia, Brazili, Shqipëria, Turqia dhe Dubai.

Për SPAK, përdorimi i këtyre mekanizmave, i kombinuar me shoqëritë tregtare dhe ndarjen e roleve mes anëtarëve, përbënte një element të rëndësishëm të mënyrës se si organizata financonte aktivitetin dhe administronte përfitimet e dyshuara kriminale.

Struktura drejtuese dhe personat e tjerë në rrjet

Përveç Franc Gergelyt dhe Ervis Çelës, hetuesit kanë identifikuar edhe persona të tjerë me funksione drejtuese dhe operacionale.

Në nivelin e parë drejtues, krahas dy emrave kryesorë, përfshihet edhe Fadil Balla, i cili, sipas të dhënave të hetimit, vepronte kryesisht në bashkëpunim me Ervis Çelën dhe persona të tjerë të përfshirë.

Në nivelin e dytë përmenden Petrit Lakatos dhe Maringlen Mullaj. Lakatos, i identifikuar si bashkëpunëtor i afërt i Franc Gergelyt, dyshohet se kishte rol në nxjerrjen e ngarkesave nga porti i Anversës, magazinimin dhe shpërndarjen me shumicë në Holandë, si dhe administrimin e të ardhurave.

Ndërsa Mullaj rezulton në hetim si person i angazhuar në koordinimin e aktivitetit operacional nën drejtimin e Ervis Çelës dhe Fadil Ballës.

Sipas prokurorisë, personat e përfshirë në nivelet e ndryshme të organizatës kishin bashkëpunëtorë të tjerë, të cilët merreshin me transportin e lëndës narkotike, dorëzimin e saj, mbledhjen e parave dhe dërgimin e ngarkesave drejt destinacioneve të përcaktuara.

Mbi 60 tonë kokainë të trafikuara gjatë dy viteve

Një prej të dhënave më të rënda që del nga hetimi lidhet me volumin e lëndës narkotike që dyshohet se ka kaluar përmes këtij rrjeti.

Nga ndërthurja e komunikimeve në SkyECC dhe EncroChat me provat e siguruara përmes bashkëpunimit ndërkombëtar, SPAK ka arritur në përfundimin se organizata ka organizuar dhe realizuar trafikimin e të paktën 60.7 tonë kokainë nga Amerika e Jugut drejt Europës, gjatë viteve 2019–2021.

Në kuadër të hetimit janë identifikuar edhe disa episode konkrete të sekuestrimit të sasive të mëdha të kokainës:

• Dhjetor 2019 – Roterdam, Holandë: rreth 255 kilogramë kokainë.

• Prill 2020 – Barcelona, Spanjë: rreth 495 kilogramë kokainë.

• Maj 2020 – Roterdam, Holandë: rreth 300 kilogramë kokainë.

• Nëntor 2020 – Holandë: rreth 600 kilogramë kokainë.

• Shkurt 2021 – Hamburg, Gjermani: rreth 17 tonë kokainë.

Sipas përllogaritjes së paraqitur nga SPAK, pesë episodet përfaqësojnë gjithsej rreth 18.650 kilogramë kokainë, ose 18.35 tonë.

Prokuroria vlerëson se përmasat e aktivitetit, kohëzgjatja dhe shtrirja gjeografike dëshmojnë për kapacitete të konsiderueshme financiare, logjistike dhe organizative.

Lidhjet me trafikantët në Amerikën e Jugut

Hetimi nuk është kufizuar vetëm te personat e identifikuar në Shqipëri dhe Europë. SPAK ka evidentuar edhe një rrjet bashkëpunëtorësh të huaj, të cilët dyshohet se kanë luajtur role në furnizimin me kokainë, financimin dhe pastrimin e parave.

Një prej personave të përmendur është shtetasi uruguaian me inicialet S.E.M.C., i arrestuar në Bolivi në vitin 2023 dhe më pas i ekstraduar në Shtetet e Bashkuara të Amerikës. Sipas të dhënave të Departamentit Amerikan të Drejtësisë dhe DEA-s, ai dyshohet se drejtonte një organizatë ndërkombëtare të trafikut të kokainës nga Amerika e Jugut drejt Europës, si dhe të pastrimit të të ardhurave nga kjo veprimtari.

Në rrjetin e kontakteve përmendet edhe një tjetër shtetas uruguaian, F.E.S.V., i cili dyshohet se ndërmjetësonte transferimin e miliona dollarëve nga Europa drejt Amerikës së Jugut dhe destinacioneve të tjera. Ai u arrestua në Paraguaj në gusht 2023, në kuadër të operacionit antidrogë “A Ultranza PY”, dhe në korrik 2024 u ekstradua drejt SHBA-së.

Një rol të rëndësishëm në infrastrukturën tregtare dyshohet se kishte edhe shtetasi paraguajan D.I.B.C., pronar i disa kompanive që, sipas hetimit, përdoreshin për magazinimin dhe kamuflimin e kokainës në produkte të ligjshme. Ai rezulton i shpallur në kërkim ndërkombëtar.

Në dokumentacion përmendet gjithashtu shtetasi paraguajan A.R.G., i arrestuar dhe i përballur me akuza për trafik ndërkombëtar narkotikësh dhe pastrim parash në Paraguaj. Ai zotëronte avionë sportivë, të cilët dyshohet se përdoreshin për transportimin e sasive të konsiderueshme të kokainës nga Bolivia drejt Paraguait.

Në këtë rrjet përfshihet edhe shtetasi brazilian C.S.L., i cili është në kërkim ndërkombëtar nga autoritetet braziliane. Sipas të dhënave të hetimit, ai dyshohet se ka bashkëpunuar me Ervis Çelën në blerjen, financimin dhe shpërndarjen e ngarkesave shumëtonëshe të kokainës.

Ndërkohë, dy shtetas të tjerë brazilianë, me inicialet R.P.A. dhe Th.A.D.B., dyshohet se merreshin me administrimin e laboratorëve, kontrollin e cilësisë së kokainës dhe identifikimin e ngarkesave përmes shenjave të vendosura mbi pakot e drogës.

Një prej elementeve që SPAK evidenton për marrëdhënien mes Ervis Çelës dhe furnizuesve është fakti se këta të fundit ishin të gatshëm t’i vinin atij dhe bashkëpunëtorëve të tij në dispozicion ngarkesa prej 2 deri në 3 tonësh kokainë pa parapagim, duke e shtyrë pagesën për një moment të mëvonshëm.

Komunikimet tregojnë gjithashtu se në disa raste laboratorët nuk arrinin të përmbushnin kërkesat për sasitë e mëdha të lëndës narkotike që kërkoheshin nga rrjeti.

Përfitime që mund të arrinin në miliarda euro

Përmasat e aktivitetit të dyshuar kanë bërë që një pjesë e rëndësishme e hetimit të përqendrohet te gjurmimi i parave dhe identifikimi i pasurive që mund të jenë krijuar përmes trafikimit të narkotikëve.

SPAK vlerëson se përfitimet financiare nga ky aktivitet mund të kenë arritur shifra jashtëzakonisht të larta, potencialisht deri në miliarda euro.

Për këtë arsye, hetuesit kanë analizuar jo vetëm pasuritë e personave të marrë të pandehur, por edhe ato të familjarëve dhe personave të lidhur me ta, për të identifikuar investime që dyshohet se mund të kenë origjinë kriminale.

Me kërkesë të Prokurorisë së Posaçme, Gjykata e Posaçme ka vendosur sekuestro preventive mbi një numër pasurish të paluajtshme, aktivitetesh tregtare, llogarish bankare dhe asetesh të tjera.

Solis Farm dhe pasuritë në Baldushk

Një prej subjekteve tregtare ndaj të cilave është vendosur masa e sekuestros është “Solis Farm”, kompani që ushtron aktivitet në fushën e agroturizmit, hotelerisë, akomodimit dhe shërbimeve bar-restorant.

Masa përfshin 100% të kuotave të shoqërisë, me aktivitet në fshatin Mumajes, në njësinë administrative Baldushk të Tiranës, si dhe pasuritë e lidhura me të.

Në listën e aseteve të sekuestruara përfshihen dy prona të regjistruara në zonën kadastrale 2736, godina e restorantit, ambientet e brendshme dhe të jashtme, si dhe pajisjet dhe orenditë që ndodhen në këto ambiente.

Gjithashtu, është vendosur sekuestro mbi një llogari bankare në emër të shtetases D.Gj., pranë Raiffeisen Bank, me gjendje monetare prej 71.268,44 eurosh.

Pasuritë e Albin Çelës dhe investimet mbi 1.2 milionë euro

Në emër të Albin Çelës dhe në bashkëpronësi me persona të tjerë janë identifikuar disa pasuri në zonën e Sharrës, në Tiranë.

Bëhet fjalë për disa parcela toke mbi të cilat janë ngritur kapanone industriale dhe objekte që shërbejnë për zhvillimin e aktivitetit tregtar.

Në listën e pasurive të sekuestruara përfshihen gjithashtu një vilë e porositur pranë shoqërisë “NG Structures” sh.p.k., për të cilën ishte kryer parapagimi, si dhe interesat ekonomikë në kompaninë “Giam Konstruksion” sh.p.k., me aktivitet në zonën e Agonasit në Kavajë.

Sipas aktit të ekspertimit të përmendur nga SPAK, Albin Çela dhe Riza Çela kanë shpenzuar më shumë se 50 milionë lekë për blerjen e tokave, ndërsa kostoja e ndërtimit të katër objekteve mbi këto sipërfaqe vlerësohet në mbi 1.2 milionë euro.

Në sekuestro është përfshirë edhe një tokë bujqësore prej 5.900 metrash katrorë në Sharrë, e regjistruar në emër të Riza Çelës.

Resorti Ajman Park dhe vila luksoze në Dhërmi

Pasuritë e lidhura me Fadil Ballën përfshijnë investime në sektorin e turizmit dhe pronave luksoze.

Një prej tyre është resorti “Ajman Park”, në Xhafzotaj të Durrësit, ku përfshihen struktura hoteliere, godina shërbimi, restorante dhe ambiente të tjera tregtare, së bashku me interesat e lidhura me shoqërinë “AMR”.

Sipas aktit të ekspertimit teknik dhe vlerësues, investimi në këtë kompleks arrin në 463.126.800 lekë.

Një tjetër pasuri e vendosur nën sekuestro është një vilë dykatëshe e tipit “Elysian”, pjesë e kompleksit turistik “Ionian Olea”, në Dhërmi, Bashkia Himarë.

Prona përfshin 103 metra katrorë në katin përdhe, 110 metra katrorë në katin e parë, ballkone dhe verandë, si dhe një parcelë në dispozicion me sipërfaqe rreth 378.2 metra katrorë. Vlera e saj e tregut, sipas vlerësimit të referuar nga SPAK, arrin në 1 milion euro.

25 automjete dhe mbi 130 mijë euro cash nën sekuestro

Masat e marra nga Gjykata e Posaçme kanë përfshirë edhe pasuritë e lidhura me shtetasin F.C.

Në këtë kuadër është vendosur sekuestro mbi 100% të kuotave të kapitalit të shoqërisë “Check Company” sh.p.k., me seli në Rrugën e Dibrës në Tiranë, si dhe mbi 25 automjete të regjistruara në pronësi të kësaj kompanie.

Vlera e mjeteve motorike, sipas përllogaritjes që përfshin edhe amortizimin e akumuluar, është 69.973.223 lekë.

Përveç pasurive të paluajtshme dhe aktiviteteve tregtare, gjatë hetimit janë sekuestruar edhe 130 mijë euro cash, automjete dhe sende të tjera me vlerë.

Në total, vlera e pasurive dhe shumave monetare të sekuestruara përllogaritet në rreth 9.181.000 euro.

Bashkëpunimi me Europolin, Eurojust dhe autoritetet amerikane

Hetimi për këtë organizatë kriminale është zhvilluar në bashkëpunim me disa institucione dhe agjenci ndërkombëtare të zbatimit të ligjit.

SPAK ka bashkëpunuar me Eurojust dhe Europol në kuadër të operacionit “White Eclipse”, si dhe me autoritetet gjyqësore të Holandës, Gjermanisë, Francës, Spanjës, Italisë, Maqedonisë së Veriut, Paraguajit, Ekuadorit, Brazilit dhe vendeve të tjera.

Një rol në mbështetjen e hetimeve kanë pasur edhe qeveria amerikane dhe zyra OPDAT pranë Ambasadës së SHBA-së në Tiranë, të cilat kanë kontribuar në lehtësimin e bashkëpunimit me autoritetet e vendeve të Amerikës së Jugut.

SPAK ka vlerësuar gjithashtu punën e hetuesve të Byrosë Kombëtare të Hetimit dhe të Sektorit Financiar, të angazhuar në dokumentimin e aktivitetit dhe gjurmimin e pasurive.

Pavarësisht përfundimit të hetimeve për 16 të pandehurit, puna e prokurorisë nuk është mbyllur. Hetimet vijojnë në kuadër të një procedimi të veçuar, me synim identifikimin e personave të tjerë të përfshirë, dokumentimin e veprave të mundshme penale dhe gjurmimin e pasurive që mund të lidhen me aktivitetin e organizatës.

SPAK thekson se të gjithë personat e marrë të pandehur prezumohen të pafajshëm deri në momentin kur fajësia e tyre të provohet me një vendim gjyqësor të formës së prerë.