Kërkon 14 vite burg për biznesmenin dhe 9 vite për Ardit Hasanbegajn

Prokuroria e Posaçme Kundër Korrupsionit dhe Krimit të Organizuar, SPAK, ka rilexuar pretencën për një pjesë të dosjes së njohur si “Metamorfoza”, pasi kjo çështje u nda nga procesi kryesor dhe iu nënshtrua procedurës së gjykimit të shkurtuar.

Të pandehurit përballen me akuza që lidhen me sigurimin e kushteve dhe mjeteve për kryerjen e një vrasjeje, pjesëmarrje në grup të strukturuar kriminal dhe armëmbajtje pa leje.

SPAK ka kërkuar dënimin me 14 vite burg për biznesmenin Pellumb Gjoka, ndërsa për ish-shefin e policisë Ardit Hasanbegaj është kërkuar një dënim prej 9 vitesh burg.

Në rast se shpallen fajtorë nga gjykata, të pandehurit përfitojnë ulje të dënimit me një të tretën, për shkak të procedurës së gjykimit të shkurtuar.

Seanca e radhës është shtyrë për më 9 mars, kur pritet që avokatët mbrojtës të paraqesin konkluzionet përfundimtare para gjykatës.

Ndërkohë, biznesmeni Pellumb Gjoka, së bashku me disa persona të tjerë, është duke u gjykuar edhe në një çështje tjetër të lidhur me dosjen “Metamorfoza”, këtë herë me procedurë të zakonshme. Kjo pjesë e hetimit lidhet me vrasjen e Gjin Ndoji, i njohur edhe me mbiemrin Boriçi.