SPAK reagon zyrtarisht për arrestimin e Ergys Agasit dhe Uljan Shpatarakut

SPAK ka dalë me njoftim zyrtar për arrestimin e Ergys Agasit dhe ish-punonjësit të Policisë së Shtetit, Uljan Shpataraku, në kuadër të hetimeve për procedimin penal nr. 20/1 të vitit 2025.

Sipas Prokurorisë së Posaçme, arrestimi i Agasit u krye më 26 gusht 2026, në hyrjen jugore të Durrësit, në zonën e Plepave, në autostradë. Në momentin e arrestimit, ai shoqërohej nga Uljan Shpataraku, i cili u arrestua në flagrancë.

SPAK bën me dije se Shpataraku akuzohet për veprën penale “Përkrahja e autorit të krimit”, të parashikuar nga neni 302/2 i Kodit Penal.

“Pas një pune disa javore në bashkëpunim të ngushtë me strukturat operacionale të specializuara të Policisë së Shtetit dhe Byrosë Kombëtare të Hetimit, sot më datë 26.8.2026, u bë i mundur arrestimi i shtetasit Ergys Agasi, në hyrjen jugore qytetit të Durrësit, në zonën e Plepave, në autostradë”, thuhet në njoftimin zyrtar.

Për çfarë hetohet Ergys Agasi?

SPAK sqaron se hetimet për procedimin penal nr. 20/1 të vitit 2025 vijojnë dhe se emri i Ergys Agasit është regjistruar në këtë procedim më 5 dhjetor 2025.

Sipas organit të akuzës, Agasi po hetohet për një sërë veprash penale, ndër të cilat:

• Konkurrencë e paligjshme nëpërmjet dhunës
• Heqje e paligjshme e lirisë
• Shkelje e barazisë së pjesëmarrësve në tendera apo ankande publike
• Grup i strukturuar kriminal
• Kryerja e veprave penale nga organizata kriminale dhe grupi i strukturuar kriminal
• Pastrimi i produkteve të veprës penale ose veprimtarisë kriminale
• Korrupsion aktiv i personave që ushtrojnë funksione publike, në bashkëpunim dhe më shumë se një herë.

Për Agasin, Gjykata e Posaçme e Shkallës së Parë ka caktuar më 15 dhjetor 2025 masën e sigurisë “arrest në burg”, me vendimin nr. 125.

Vendimi i gjykatës, sipas SPAK, i është dërguar për ekzekutim Policisë së Shtetit më 17 dhjetor 2025.

Operacioni pas disa muajsh në kërkim

Arrestimi i Agasit erdhi pas disa javësh pune të përbashkët mes SPAK, strukturave operacionale të Policisë së Shtetit dhe Byrosë Kombëtare të Hetimit.

SPAK ka falënderuar Policinë e Shtetit për operacionin, ndërsa hetimet për çështjen vijojnë.

Tashmë pritet që të zbardhen edhe rrethanat e plota që çuan në arrestimin e Agasit dhe roli që dyshohet se ka pasur ish-efektivi Uljan Shpataraku në këtë çështje.