SPAK ‘vëzhdon’ nga larg, Balluku e Rama zbarkojnë në Kryeministri

Kryeministri Edi Rama dhe zëvendëskryeministrja Belinda Balluku janë rikthyer sot në ambientet e Kryeministrisë, pas pjesëmarrjes në prezantimin e projektit “OSHEE Charge”.

Pavarësisht se ndaj saj rëndon një hetim i hapur nga SPAK, Balluku u shfaq krah kryeministrit, sikur asgjë të mos kishte ndodhur. Ajo është marrë zyrtarisht e pandehur për “shkelje të barazisë në tendera”, në lidhje me procedurat për ndërtimin e tunelit të Llogarasë — një projekt me vlerë qindra milionë euro.

Më herët, i pyetur nga Deutsche Welle për këtë çështje, Rama ka zgjedhur të shmangë komentet, duke thënë shkurt se “drejtësia ka punën e saj”.

Ndërkohë, në dosjen e hetimit janë zbardhur komunikimet mes Ballukut dhe ish-vartësit të saj, Evis Berberi, ish-drejtor i ARRSH-së në periudhën kur u zhvilluan punimet për tunelin. Pikërisht këto mesazhe kanë ngritur edhe më tej dyshimet për ndikimin e saj të drejtpërdrejtë në procesin e tenderimit.

Sipas hetimeve, dëmi i shkaktuar nga abuzimet në këtë projekt përllogaritet në dhjetëra miliona euro, ndërsa Balluku vijon të ushtrojë detyrën si zëvendëskryeministre dhe ministre e Infrastrukturës, mes kritikave për konflikt të hapur interesi.