Tabaku: Mërtiri dhe bashkëjetuesja, Stela Gugallja, vodhën 430 milionë euro

Kryetarja e Komisionit Hetimor për Inceneratorët, Jorida Tabaku, prezantoi dje raportin prej 120 faqesh mbi gjetjet e opozitës në atë që ajo e konsideron si afera e 430 milionë eurove.

Në prezantimin e këtij raporti, Tabaku bëri me dije se anëtarët e opozitës kanë administruar prova të rëndësishme nga QKB, që vërtetojnë se i shpalluri në kërkim ndërkombëtar, Mirel Mërtiri, është kryepronari i 3 inceneratorëve. Sipas kryetares së komisionit, pronarja tjetër, Stela Gugallja, është bashkëjetuesja e Mërtirit, ndërsa Klodian Zoto është vartësi i tij.

Tabaku u shpreh se gjatë hetimit ishte vërtetuar se institucionet përgjegjëse kishin shkelur ligjet në fuqi në dhënien e tri kontratave koncesionare dhe se përfituesit e tyre kishin krijuar skema korruptive dhe pastrimi parash.

Nënkryetarja e PD-së deklaroi se “dëshmitari Edi Rama, në funksionin e Kryeministrit, ka gënjyer për shpalljen e emergjencës dhe se 430 mln euro janë dhënë me supozimin që është shpallur një emergjencë”.

“Mbas analizës së një dokumenti me 385 faqe të dorëzuar në këtë komision nga QKB-ja, është vërtetuar se pronarët e inceneratorëve janë 3: Klodian Zoto, Stela Gugallja dhe në pak raste Mirel Mërtiri. Por kryepronari i vërtetë i këtyre inceneratorëve është Mirel Mërtiri, shtetasi Klodian Zoto vartësi i tij, ndërkohë Stela Gugallja, bashkëjetuesja e tij, të cilët kanë menaxhuar tri kontrata prej 430 milionë eurosh.

Duke u përpjekur dhe fshehur pas kompanive holandeze, kompanive italiane dhe pas një kompanie malteze. Gjithmonë është i njëjti person që shfaqet, Mirel Mërtiri. Një person me të shkuar të dyshimtë dhe pa sukses në sipërmarrjet e tij, papritur është bërë personi kyç në një nga bizneset më fitimprurëse.

Ai pati idenë brilante për t’i propozuar ministrit Lefter Koka ndërtimin e 3 inceneratorëve. Të gjitha institucionet u vunë në dispozicion të tij për të implementuar gjetjen e shekullit që shumë vende e kanë ndaluar ta përdorin”, tha Tabaku.

Nënkryetarja e PD-së i bëri thirrje SPAK-ut për të marrë raportin.

“Lexojeni me vëmendje. Zbardhni ato pjesë që ky komision është penguar për të hetuar e dërgoni para drejtësisë të gjithë zinxhirin e gjatë të funksionarëve. Sytë e shqiptarëve janë sot drejt organeve të reja të drejtësisë. Sot drejtësia ka në dorë ta zbardhë këtë aferë, mosveprimi i tyre do t’i bëjë ato pjesë të kësaj afere kriminale”, tha Tabaku.

SKEMA

Kryetarja e Komisionit të Inceneratorëve, Jorida Tabaku, deklaroi dje se nga analizimi i të dhënave rezulton që kompanitë koncesionare të inceneratorëve kanë përdorur tri mënyra për të qarkulluar paratë e buxhetit të shtetit, duke krijuar një skemë të madhe piramidale dhe evazioni fiskal, me qëllim përfitime të paligjshme.

“Sëpari, kompanitë e inceneratorëve kanë përdorur buxhetin e shtetit për të tërhequr paradhënie shumicën e shumës së premtuar në formën e paradhënies dhe më tej ato kanë zhdoganuar mallra më pak se sa ajo e zotuar në kontrata. Së dyti, është mënyra përmes së cilës ato kanë vepruar, ajo e krijimit të transfertave të parave jashtë vendit. Duke krijuar kështu mundësinë që paratë e buxhetit shqiptar të dalin jashtë territorit të vendit pa përfunduar punën.

Së treti, është mënyra e krijimit të një miksi mes sajimit të kompanive fiktive me fatura të TVSH-së dhe gjithashtu transferimi i parave në kompaninë ITS, e cila është përdorur si një kompani guaskë, përmes së cilës janë shpërndarë paratë në të tjera kompani. Fillesa e kësaj ndihme ndodh me krijimin e Komitetit Ndërministror për Menaxhimin e Mbetjeve në fund të vitit 2013, që më tej u shoqërua me një mbledhje me mungesë kuorumi, ku u miratua një dokument pa asnjë vlerë, që u konsiderua si Vendim i Komitetit Teknik.

Ky komitet u mblodh në 5 shkurt, pa pasur kuorumin e nevojshëm prej më së paku 11 anëtarësh dhe më tej u firmos nga 3 prej 5 anëtarëve të pranishëm. E gjithë kjo skemë më pas shtyu serinë e veprimeve të institucioneve lokale dhe qendrore për të ndërtuar një skemë korruptive”, tha Tabaku.

Raporti, Felaj: Opozita nuk provoi akuzat ndaj qeverisë për korrupsion

Nënkryetarja e Komisionit Hetimor për Inceneratorët, Ermonela Felaj, prezantoi raportin e përmbledhur të maxhorancës mbi rezultatet që prodhoi ky komision hetimor, të cilin e cilësoi si kompleks.

Gjatë fjalës në mbledhjen e fundit të komisionit, deputetja e PS-së mbrojti procedurat për dhënien me koncesion të inceneratorëve, duke e cilësuar tërësinë e akteve të ndërmarra si të bazuara në ligj. Sipas saj, koncesionet për ndërtimin e inceneratorëve u dhanë pas shpalljes së emergjencës mjedisore.

“Ne anëtarët e maxhorancës sot kemi gati raportin mbi gjetjet gjatë këtij komisioni hetimor. Ky komision synonte nxjerrjen e përgjegjësive institucionale. Deri në vitin 2013, situata në vendin tonë ishte katastrofike. Ndërtimi i impianteve të trajtimit të mbetjeve filloi kur venddepozitimet ekzistuese kishin mbaruar de facto funksionalitetin e tyre. Ky moment përcaktoi edhe shpalljen e emergjencës mjedisore vend. Të dyja VKM-të kanë qenë të bazuara në ligj. E gjithë procedura në tërësinë e akteve ka qenë e ligjshme. Komisioni bëri shkelje procedurale dhe përmbajtjesore në mbledhjen e informacionit dhe pyetjen e dëshmitarëve”, tha Felaj.

Për sa i përket inceneratorit të Elbasanit, Felaj u shpreh se ai ka prodhuar energji dhe socialistët kanë përfshirë në raport një kërkesë nga koncensionarë drejtuar OSHEE-së për futjen e energjisë në rrjet. Për arrestimin e ish-ministrit të PS-së, i arrestuar për shpërdorim detyre dhe korrupsion, Felaj tha se:

“Nuk do komentojmë veprimet e Autoritetit Kontraktor, pasi po hetohet nga drejtësia, por nuk bëjmë avokatinë e askujt. E kemi të qartë përgjegjësinë individuale dhe kolektive”.

Për nënkryetaren e komisionit: “Në lidhje me procedurën koncesionare të Elbasanit, nga ana e kërkuesve të këtij komisioni, është pretenduar që impianti i incenerimit nuk funksionon. Ne në komision kemi administruar një shkresë, përmbajtja e së cilës nuk është arritur të kontestohet me prova të tjera. Është një shkresë e OSHEE-së, në të cilën konfirmohet se për inceneratorin e Elbasanit, ju bëjmë me dije se shoqëria ‘Albetk Energy’ ka aplikuar pranë OSHEE-së për lidhje të burimit gjenerues me rrjetin shpërndarës të OSHEE-së që në gusht të vitit 2016. Në prill të vitit 2017 është instaluar në objekt matësi i energjisë. Në 06.06.2017 shoqëria ka njoftuar OSHEE-në se do të kalojë në regjim dhënie energjie. Deri më datë 8 nëntor ky subjekt ka njoftuar se ka injektuar në rrjetin shpërndarës të energjsë sasinë mbi 6 mijë megavate energji elektrike”, tha Felaj.