Denoncimi i deputetes: Në vend  të tyre, do të ndërtohen kulla!

Deputetja e Partisë Demokratike, Jorida Tabaku, zhvilloi një interpelancë në Kuvend me kryeministrin Edi Rama, i cili zgjodhi ta delegojë përfaqësimin te ministrja e Ekonomisë, Delina Ibrahimaj.

Në fjalën e saj, Tabaku ngriti një sërë pikëpyetjesh mbi funksionimin dhe nivelin e transparencës së Korporatës së Investimeve, duke kërkuar sqarime të detajuara për inventarin e pronave dhe marrëdhëniet me sektorin privat.

“Cili është inventari i këtyre pronave që ka kjo korporatë? Mbi çfarë parimesh bëhen marrëveshjet me privatët? Si përzgjidhen dhe si garantohet që korporata nuk është e lidhur me krimin, siç ka ndodhur me PPP-të?” u shpreh ajo.

Deputetja ndaloi edhe te projekte konkrete, duke përmendur Pallatin e Kongreseve dhe shtëpinë e fëmijës “Zyber Hallulli”, për të cilat, sipas saj, ekzistojnë plane zhvillimi që mund të ndryshojnë funksionin aktual.

“Mbi çfarë parimi është vendosur që Pallati i Kongreseve t’i kalojë korporatës, që mund të çojë në shembjen e tij dhe ndërtimin e kullave? E njëjta gjë edhe për shtëpinë e fëmijës ‘Zyber Hallulli’,” deklaroi Tabaku.

Ajo akuzoi qeverinë për mungesë të theksuar transparence, duke theksuar se për projekte të mëdha publike mungon publikimi i dokumentacionit bazë financiar.

“Cili është inventari i këtyre pronave që ka kjo korporatë. Mbi çfarë parimesh bëhen ujditë me privatët. Si përzgjidhen, si garantohet që korporata nuk është e lidhur me krimin, siç ka ndodhur me PPP. Mbi çfarë parimi është vendosur që Pallati i Kongreseve t’i kalojë Korporatë, që do të shembë Pallatin e Kongreseve dhe do të ndërtohen kulla, apo dhe shtëpia e fëmijës ‘Zyber Hallulli’, ku do të ndërtohen kulla. Ndaj Rama duhet të vinte të jepte llogari. Asnjë transparencë. Edhe për një stilolaps kërkohet transparencë, po për projektet e mëdha? Pse nuk botohen bilancet, raportet vjetore?”, tha ajo.