Të shtëna me armë zjarri në Tiranë, plagoset 54-vjeçari

Një 54-vjeçar dyshohet se është plagosur me armë zjarri në këmbë në Tiranë, në rrethana që mbeten ende të paqarta.

Sipas informacionit paraprak, ngjarja është bërë e ditur mëngjesin e 14 tetorit 2026, kur rreth orës 06:50, shtetasi me inicialet G. A., rreth 54 vjeç, është paraqitur për ndihmë mjekësore në një spital shtetëror.

Nga të dhënat paraprake dyshohet se ai është qëlluar me armë zjarri në këmbë, në rrugën “Josif Pashko”, në kryeqytet.

I plagosuri ndodhet jashtë rrezikut për jetën.

Ndërkohë, grupi hetimor po punon për të zbardhur rrethanat e ngjarjes, për të identifikuar dhe kapur autorin e dyshuar, si dhe për të dokumentuar plotësisht rastin nga ana ligjore.

Deri në këto momente, nuk janë bërë të ditura të dhëna të tjera mbi motivet e mundshme të ngjarjes.