Të shtunën protestë, Ambasada e SHBA-së del me thirrjen e fortë

Ambasada e Shteteve të Bashkuara të Amerikës në Tiranë ka lëshuar një paralajmërim për qytetarët amerikanë, duke u kërkuar të tregojnë kujdes dhe të shmangin zonat ku zhvillohen protestat, në prag të demonstratës së paralajmëruar për të shtunën.

Në njoftimin e saj, ambasada bën të ditur se tubimet në qendër të kryeqytetit dhe pranë institucioneve qeveritare vijojnë, ndërsa disa prej tyre janë shoqëruar me përplasje të dhunshme, përdorim të mjeteve ndezëse, hedhje gurësh dhe dëmtim të pronës.

Sipas paralajmërimit, demonstrata të tjera mund të zhvillohen edhe në ditët në vijim, jo vetëm në Tiranë, por edhe në qytete të tjera të Shqipërisë.

Paralajmërimi për gazin lotsjellës dhe bllokimet e rrugëve

Ambasada paralajmëron se protestat mund të shtrihen edhe në akset rrugore përreth, duke sjellë shtim të pranisë policore, bllokime të qarkullimit, devijime dhe mbyllje të rrugëve.

Një tjetër shqetësim lidhet me rrezikun e ekspozimit ndaj mjeteve të përdorura gjatë përplasjeve. Në njoftim përmenden gazi lotsjellës, fishekzjarrët e hedhur në drejtim horizontal, mjetet ndezëse dhe predhat prej gome.

Për këtë arsye, personelit të ambasadës i është kërkuar të shmangë të gjitha zonat ku zhvillohen demonstratat.

Gjithashtu, paralajmërohet se mund të ketë kufizime ose mbyllje të shërbimeve publike në Tiranë, përfshirë transportin publik dhe institucionet qeveritare.

Thirrja e ambasadës për qytetarët amerikanë

Ambasada u kërkon qytetarëve amerikanë të shmangin protestat, të tregojnë vëmendje ndaj situatës përreth dhe të ndjekin njoftimet e mediave lokale, si dhe udhëzimet e autoriteteve shqiptare.

Në të njëjtën kohë, ata këshillohen të kenë një plan emergjence dhe një mënyrë për t’u larguar nga zonat ku mund të zhvillohen demonstratat.

Paralajmërimi vjen në një klimë tensionesh pas përplasjeve të regjistruara në protestat e fundit në kryeqytet, ndërsa demonstrata e së shtunës pritet të mbajë në vëmendje sigurinë dhe situatën në Tiranë.