Tenderi 1.6 milionë € për uniformat e “Illyrian Guard” përfundon në kaos

Një tender me fond rreth 1.6 milionë euro për furnizimin me uniforma të “Illyrian Guard” është mbyllur pa një fitues, pas një serie të gjatë ankesash, skualifikimesh, rikthimesh në rivlerësim dhe përplasjesh mes kompanive pjesëmarrëse.

Procedura, e hapur në qershor 2025 dhe me zhvillim të ofertave më 29 gusht, u shndërrua në një proces të zgjatur që përfundoi me anulimin e tenderit nga vetë “Illyrian Guard”. Përgjatë procesit, operatorët ekonomikë ngritën pretendime për kriteret e tenderit, dokumentacionin e paraqitur nga konkurrentët, certifikatat, raportet laboratorike dhe çmimet e ofertave.

Në vend që procedura të përfundonte me përzgjedhjen e një kompanie për furnizimin e uniformave, dosja u përplas për muaj me vendime dhe ankesa në Komisionin e Prokurimit Publik.

Pikëpyetjet nisën që me dokumentet e tenderit

Problemet u shfaqën që në fazat e para të procedurës. Kompania “Toni Oil” kundërshtoi dokumentet e tenderit, duke pretenduar se për disa prej artikujve mungonin specifikime të mjaftueshme.

Krahas kësaj, kompania ngriti pretendime për mospërputhje mes versionit në gjuhën shqipe dhe atij në anglisht, si dhe për kritere që, sipas saj, mund të kufizonin konkurrencën mes operatorëve ekonomikë.

Më tej, procedura u përball me skualifikimin e “Arisa-Konfeksion” dhe bashkimit të operatorëve “Malbertex” dhe “Univers Promotions”.

Vendimet nuk i dhanë fund përplasjes. Kompanitë e prekura nga skualifikimet paraqitën ankesa dhe, në vijim të vendimeve të Komisionit të Prokurimit Publik, ofertat u rikthyen për rivlerësim.

Përplasja mes kompanive zhvendoset te dokumentet

Me kalimin e procedurës në fazat e tjera të shqyrtimit, edhe kompanitë pjesëmarrëse nisën të kundërshtonin dokumentacionin e konkurrentëve.

Një prej operatorëve, “Vojsava Zenelaj”, kundërshtoi kualifikimin e rivalëve dhe kërkoi verifikimin e autorizimeve, certifikatave dhe raporteve të testimit të paraqitura në kuadër të tenderit.

Një nga rastet që tërhoqi vëmendje lidhet me dokumentet e testimit të paraqitura nga “Arisa-Konfeksion”. Pikëpyetjet u ngritën rreth raporteve laboratorike që lidhen me laboratorin turk AZOLAB.

Sipas dokumentacionit të procedurës, laboratori nuk konfirmoi raportet përkatëse, edhe pas kërkesave të bëra nga “Illyrian Guard” për verifikimin e tyre.

Kjo situatë u kthye në një prej pikave të debatit rreth vlefshmërisë së dokumenteve të paraqitura nga kompania. “Arisa-Konfeksion” u skualifikua sërish, ndërsa mungesa e konfirmimit nga laboratori u përdor në procesin e shqyrtimit të dokumentacionit.

Oferta nën kosto, një tjetër pikë e nxehtë e tenderit

Një tjetër problem i evidentuar gjatë procedurës lidhej me ofertën e paraqitur nga bashkimi “Malbertex” dhe “Univers Promotions”, e cila u konsiderua anomalisht e ulët.

Në kuadër të verifikimit të ofertës, kompanive iu kërkua të justifikonin çmimet e paraqitura. Sipas vlerësimeve të bëra gjatë procedurës, nuk u paraqitën dokumente të mjaftueshme për të shpjeguar strukturën e këtyre çmimeve.

Mes dokumenteve të kërkuara ishin kontrata furnizimi, fatura, dokumente doganore dhe prova që lidhen me transportin e mallrave.

Një tjetër element i ngritur gjatë shqyrtimit ishte fakti se një prej artikujve ishte ofertuar me një çmim që rezultonte më i ulët se kostoja e blerjes.

Pas një vendimi tjetër të KPP-së, oferta u rikthye për rivlerësim, por përfundoi sërish e skualifikuar. Përplasja administrative nuk u mbyll me këtë vendim, pasi operatorët vijuan me ankesa të reja dhe kërkuan edhe pezullimin e procedurës.

15 muaj ankesa dhe në fund anulimi i tenderit

Pas muajsh përplasjesh mes operatorëve ekonomikë dhe shqyrtimesh në Komisionin e Prokurimit Publik, “Illyrian Guard” vendosi të anulojë të gjithë procedurën.

Por edhe anulimi nuk e mbylli çështjen.

Kompania “Vojsava Zenelaj” kundërshtoi vendimin dhe kërkoi shfuqizimin e anulimit, duke kërkuar që procesi të vijonte me shqyrtimin e dokumentacionit të paraqitur nga kompanitë rivale.

Në këtë pikë, tenderi për uniformat, me fond rreth 1.6 milionë euro, mbeti pa një operator fitues.

Nga dokumentet e bëra publike nuk rezulton një shpjegim i plotë që të sqarojë në mënyrë përfundimtare arsyen e anulimit të procedurës, ndërsa debatet për vlefshmërinë e ofertave dhe dokumenteve të paraqitura nga operatorët mbetën pjesë e përplasjes administrative.

Në fund, pas rreth 15 muajsh procedurë, miliona eurot e parashikuara për uniformat nuk u kontraktuan. Tenderi u anulua, kompanitë vijuan përplasjet për dokumentet dhe ofertat, ndërsa “Illyrian Guard” mbeti pa përfunduar procedurën për furnizimin me uniformat e parashikuara.