Tërmeti shkatërrues në Turqi dhe Siri, çarja e tokës dallohet që nga hapësira

Bilanci i viktimave në kufirin mes Turqisë dhe Sirisë, aty ku mëngjesin e 6 shkurtit u regjistrua një tërmet i fuqishëm 7.8 ballë është rritur ndjeshëm.Qindra mijëra njerëz në të dy vendet kanë mbetur të pastrehë në mes të dimrit, teksa shumë prej tyre janë strehuar në strehimore të improvizuara në parkingjet e makinave të supermarketeve, xhamitë, buzë rrugëve ose mes rrënojave, shpesh të dëshpëruar për ushqim, ujë dhe nxehtësi.

Ndërkohë imazhet satelitore tregojnë çarje të sipërfaqes së tokës në Turqinë juglindore të shkaktuara nga tërmetet shkatërruese që goditën rajonin të hënën, më 6 shkurt. Imazhet, të krijuara nga sizmologu francez Nahel Belgherze duke përdorur teknologjinë Maxar, u postuan në Twitter me imazhe të kundërta të kapura në vitin 2020 për të theksuar dëme në qytetin turk të Nurdagi në provincën Gaziantep. Sipas sizmologut, tërmetet shkaktuan disa qindra metra çarje të gjata sipërfaqësore me zhvendosje horizontale deri në katër metra në qytet.