Në pranga pronari dhe kamerieri

Një ngjarje tragjike është regjistruar në fshatin Arrameras, në Fushë-Krujë, ku një 16-vjeçar, i punësuar si kamerier në një restorant, ka humbur jetën pas një aksidenti me ashensorin e lokalit.

Në lidhje me ngjarjen, e ndodhur më 11 tetor 2026, policia ka arrestuar dy persona: një kamerier 26-vjeçar dhe pronarin 62-vjeçar të restorantit.

Sipas hetimeve paraprake, 26-vjeçari me inicialet E. S., i cili punonte në të njëjtin restorant, dyshohet se e ka shtyrë me duar 16-vjeçarin brenda ashensorit. Pas shkëputjes së ashensorit, i mituri ka humbur jetën.

Specialistët e Komisariatit të Policisë Krujë kanë arrestuar në flagrancë 26-vjeçarin, i cili dyshohet për veprën penale “Vrasja nga pakujdesia”.

Në pranga ka përfunduar edhe pronari i restorantit, 62-vjeçari me inicialet A. V. Ai dyshohet për veprat penale “Shkelja e rregullave të mbrojtjes në punë” dhe “Fshehja e të ardhurave”.

Ngjarja ka ndodhur në ambientet e restorantit në pronësi të 62-vjeçarit, ndërsa hetuesit po punojnë për të përcaktuar rrethanat e plota të aksidentit dhe përgjegjësitë e personave të përfshirë.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të kësaj tragjedie.