Rexhep Rraja mes të akuzuarve

Prokuroria e Posaçme ka përfunduar hetimet dhe ka dërguar për gjykim 17 persona, të dyshuar për përfshirje në një rrjet ndërkombëtar të trafikut të narkotikëve. Sipas SPAK, grupi dyshohet se ka trafikuar sasi të mëdha kanabisi nga Shqipëria drejt vendeve të Europës, si dhe kokainë nga Ekuadori drejt Holandës.

Në mesin e personave të dërguar për gjykim janë Emiljan Burba, Rexhep Rraja dhe Ervis Shuli, për të cilët hetuesit kanë arritur në përfundimin se kanë pasur rolin e drejtuesve dhe financuesve të aktivitetit të paligjshëm, ndërsa personat e tjerë dyshohet se kanë vepruar si pjesëmarrës.

Sipas dosjes hetimore, bëhet fjalë për tre episode të trafikut të drogës, të regjistruara mes nëntorit 2020 dhe janarit 2021, gjatë të cilave autoritetet e huaja sekuestruan gjithsej rreth 1.958 kilogramë kanabis dhe 475 kilogramë kokainë.

Si u zbulua rrjeti i trafikut të drogës

Hetimet e Prokurorisë së Posaçme janë mbështetur edhe në komunikimet e zhvilluara përmes platformës së enkriptuar Sky ECC. Sipas SPAK, këto komunikime janë siguruar nga autoritetet franceze në kuadër të bashkëpunimit të ndërsjellë juridik dhe kanë shërbyer për të dokumentuar koordinimin mes personave të dyshuar.

Prokuroria pretendon se të pandehurit kanë bashkëpunuar me njëri-tjetrin, me persona të dënuar nga autoritetet e huaja dhe me individë të tjerë, identiteti i të cilëve ende nuk është përcaktuar plotësisht.

Rrjeti dyshohet se ka organizuar transportin e lëndëve narkotike nga Shqipëria dhe Ekuadori drejt disa destinacioneve ndërkombëtare, përfshirë Gjermaninë, Turqinë, Malin e Zi dhe Holandën.

Tre episodet e trafikut të narkotikëve

Sipas të dhënave të administruara gjatë hetimit, veprimtaria e dyshuar përfshin tri raste kryesore të sekuestrimit të drogës nga autoritetet e huaja.

• 3 nëntor 2020: Në Mal të Zi u sekuestruan 1.722 kilogramë marijuanë, e cila, sipas hetimeve, ishte nisur nga Shqipëria dhe kishte si destinacion përfundimtar Gjermaninë.

• 23 nëntor 2020: Autoritetet holandeze sekuestruan 475 kilogramë kokainë në portin e Vlissingen. Sasia e drogës dyshohet se ishte transportuar nga Ekuadori.

• 26 janar 2021: Në Turqi u sekuestruan rreth 236 kilogramë marijuanë, e nisur nga Shqipëria me destinacion përfundimtar Turqinë.

Në total, sipas këtyre episodeve, bëhet fjalë për 1.958 kilogramë kanabis dhe 475 kilogramë kokainë të sekuestruara jashtë Shqipërisë.

Kush janë 17 personat e dërguar për gjykim

Përveç Emiljan Burbës, Rexhep Rrajës dhe Ervis Shulit, në dosjen e SPAK përfshihen edhe Bujar Sefa, i njohur gjithashtu me pseudonimet Xaka dhe Lala; Marvin Bushati; Jani Çavo; Përparim Rraja; Gazmir Rraja; Sokol Qaja; Aldo Gjini, i njohur si Iamandi; Bledar Cafi, i njohur si Blerti; Endrit Dokle, i njohur si Indrit; Zamir Aliaj, i njohur si Çoku; Islam Sefa, i njohur si Xaka; Hajdar Sefa, i njohur me pseudonimet Xaka dhe Lala; Vidjan Baroka dhe Agim Nina, i njohur gjithashtu si Lorenc Selmani.

Sipas ndarjes së bërë në dosjen hetimore, tre personat e cilësuar nga SPAK si drejtues dhe financues janë akuzuar për trafikim të lëndëve narkotike në kuadër të një grupi të strukturuar kriminal dhe për drejtimin e këtij grupi.

Për personat e tjerë, akuzat ndryshojnë sipas rolit dhe episodeve për të cilat dyshohet se kanë qenë të përfshirë. Në rastin e Marvin Bushatit, SPAK ka ngritur edhe akuzën për mbajtje pa leje dhe prodhim të armëve dhe municionit, pasi sende të tilla dyshohet se janë sekuestruar në banesën e tij gjatë ekzekutimit të masës së sigurisë më 10 dhjetor 2025.

Hetimet vijojnë për bashkëpunëtorët dhe pasuritë

Dërgimi i 17 personave për gjykim nuk shënon përfundimin e të gjitha hetimeve për këtë çështje. SPAK bën me dije se ka ndarë një pjesë të akteve të procedimit penal nr. 9 të vitit 2024, duke regjistruar një procedim të ri me numër 9/1 të vitit 2026.

Hetimet e mëtejshme synojnë identifikimin e bashkëpunëtorëve të tjerë të mundshëm dhe vijimin e verifikimeve pasurore lidhur me veprimtarinë e dyshuar kriminale.

Çështja është hetuar në bashkëpunim me autoritetet e drejtësisë në Gjermani, Francë, Holandë, Belgjikë, Mal të Zi, Turqi dhe Ekuador, si dhe me Eurojust, Europol, Policinë e Shtetit dhe Byronë Kombëtare të Hetimit.

Të 17 personat do të përballen me procesin gjyqësor për akuzat e ngritura ndaj tyre. Fajësia e secilit prej të pandehurve duhet të provohet me vendim gjyqësor të formës së prerë.

Njoftimi i plotë:

Prokuroria e Posaçme kundër Korrupsionit dhe Krimit të Organizuar përfundoi hetimet dhe ka dërguar në Gjykatën e Posaçme të Shkallës së Parë kërkesën për gjykimin e procedimit penal  nr. 9 të vitit 2024, në ngarkim të 17 të pandehurve:

1.  Emiljan Burba, Rexhep Rraja dhe Ervis Shuli, të akuzuar për kryerjen e veprave penale:

 “Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal, Kryerje e veprave penale nga organizata kriminale ose grup i strukturuar kriminal”,

“Grup i strukturuar kriminal”, kryer në formën e drejtimit, parashikuar nga neni 333/a/1 i Kodit Penal.

2. Bujar Sefa (alias Xaka, alias Lala), të akuzuar për kryerjen e veprave penale:

“Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, më shumë se një herë, parashikuar nga nenet 283/a/2 dhe 28 pika 4 të Kodit Penal, në lidhje me nenin 334/1 të Kodit Penal, “Kryerje e veprave penale nga organizata kriminale ose grup i strukturuar kriminal”,

“Grup i strukturuar kriminal”, kryer në formën e pjesëmarrjes, e parashikuar nga neni 333/a/2 i Kodit Penal.

 3. Marvin Bushati, i akuzuar për kryerjen e veprave penale:

“Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal, “Kryerje e veprave penale nga organizata kriminale ose grup i strukturuar kriminal”,

“Grup i strukturuar kriminal”, kryer në formën e pjesëmarrjes, parashikuar nga neni 333/a/2 i Kodit Penal,

“Mbajtja pa leje dhe prodhimi i armëve, armëve shpërthyese dhe i municionit” në banesë, të parashikuar nga neni 278/4 i Kodit Penal, të sekuestruar në banesë gjatë momentit të ekzekutimit të masës së sigurimit personal më datë 10.12.2025.

4. Jani Çavo, Përparim Rraja, Gazmir Rraja, Sokol Qaja, Aldo Gjini (alias Iamandi), Bledar (alias Blerti) Cafi, Endrit (alias Indrit) Dokle, Zamir Aliaj (alias Çoku), të akuzuar për kryerjen e veprave penale:

“Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal “Kryerja e veprave penale nga organizata kriminale ose grupi i strukturuar kriminal”,

“Grup i strukturuar kriminal”, kryer në formën e pjesëmarrjes, parashikuar nga neni 333/a/2 i Kodit Penal,

5. Islam Sefa (alias Xaka), Hajdar Sefa (alias Xaka, alias Lala), dhe Vidjan Baroka, të akuzuar për kryerjen e veprave penale:

“Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal “Kryerje e veprave penale nga organizata kriminale ose grup i strukturuar kriminal”.

6. Agim Nina (alias Lorenc Selmani), i akuzuar për kryerjen e veprave penale:

“Trafikim i lëndëve narkotike”, kryer në bashkëpunim, parashikuar nga neni 283/a/2 i Kodit Penal.

Nga tërësia e hetimeve të kryera, ka rezultuar se të pandehurit dhe bashkëpunëtorët e tyre përmes komunikimeve në aplikacionin e platformës së enkriptuar “SkyEç”, janë koordinuar mes tyre për kryerjen e aktiviteteve të ndryshme kriminale. Këto komunikime janë administruar nga autoritetet e drejtësisë franceze, në kuadër të ndihmës së ndërsjellët juridike.

Të pandehurit në bashkëpunim mes tyre, me persona të dënuar nga autoritetet e huaja dhe në bashkëpunim me persona të paidentifikuar ende, kanë trafikuar nga Shqipëria dhe vendet e Amerikës Latine (Ekuadori) në drejtim të Malit të Zi, Gjermanisë, Turqisë dhe Holandës, sasitë e lëndëve narkotike sipas episodeve të renditura mëposhtë:

 –    Episodi i parë, datë 3.11.2020 – Autoritetet kompetente të Malit të Zi sekuestruan sasinë prej 1722 kg marijuanë, e dërguar nga Shqipëria me destinacion përfundimtar Gjermaninë.

–     Episodi i dytë, datë 26.1.2021 –  Autoritetet kompetente të Turqisë sekuestruan sasinë prej rreth 236 kg marijuanë, e dërguar nga Shqipëria me destinacion përfundimtar Turqinë.

–  Episodi i tretë, datë  23.11.2020 – Autoritetet kompetente të Mbretërisë së Holandës sekuestruan sasinë prej 475 kg kokainë, e dërguar nga Ekuadori në Portin Vlissingen, Holandë.

Në përfundim të hetimeve është konkluduar se të pandehurit Emiljan Burba, Rexhep Rraja dhe Ervis Shuli, kanë pasur rolin e drejtuesit dhe financuesit në veprimtarinë e paligjshme kriminale ndërsa të pandehurit e tjerë ishin në rolin e pjesëmarrësve.

Me qëllim identifikimin e bashkëpunëtorëve të të pandehurve si dhe vijimin e hetimit pasuror kemi proceduar me ndarjen e akteve të procedimit penal nr. 9 të vitit 2024, numërtimin si procedimi penal i ri me nr. 9/1 i vitit 2026, dhe vijimin e hetimeve për konsumimin e elementëve të veprave penale të mëposhtme:

“Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a, dhe 28 pika 4 të Kodit Penal, në lidhje me nenin 334/1 të Kodit Penal “Kryerje e veprave penale nga organizata kriminale ose grup i strukturuar kriminal”,

Grup i strukturuar kriminal”, parashikuar nga neni 333/a i Kodit Penal,

“Trafikim i lëndëve narkotike”, kryer në bashkëpunim, parashikuar nga nenet 283/a/2, të Kodit Penal.

Hetimet janë kryer në bashkëpunim të ngushtë me autoritetet e drejtësisë gjermane, franceze, holandeze, belge, malazeze, turke, ekuadoriane, Eurojust dhe Europol, strukturat e hetimit të Departamentit të Policisë Kriminale në Policinë e Shtetit, si dhe Byronë Kombëtare të Hetimit.

 Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.