U publikua në media pjesë opinionit të Venecias për Metën, Ambasada Amerikane e prerë: Respektoni konfidencialitetin!

Gjithashtu, në reagim Ambasada përshëndet vendimin e qeverisë për të mos ndërmarrë hapa të tjerë në ligj deri në finalizimin e opinionit të Venecias. Ky reagim i Ambasadës së SHBA në Tiranë vjen pasi në media sot u publikua një fragment i draft-opinionit paraprak, që i jepte të drejtë Presidentit Meta. Sipas udhëzimit të Venecias, asnjë pjesë e këtij draft-opinioni nuk duhet të bëhej publik.

“Nxisim të gjitha palët që të respektojnë procesin e Komisionit të Venecias, përfshi kërkesën për konfidencialitet të projekt-opinionit deri sa të finalizohet. Mirëpresim vendimin e qeverisë për të mos ndërmarrë veprime të mëtejshme lidhur me legjislacionin përkatës derisa opinioni të finalizohet. Po ashtu mirëpresim deklaratën e bërë nga Presidenti Meta gjatë konferencës së tij për shtyp me Presidentin e Bullgarisë, duke afirmuar rëndësinë e një vendimi pozitiv nga BE për të hapur negociatat drejt anëtarësimit për Shqipërinë. Duhet të qëndrojmë të përqendruar tek ajo që ka më shumë rëndësi – sundimi i ligjit dhe e ardhmja e Shqipërisë në Evropë”, thuhet në reagimin e Ambasadës Amerikane në Tiranë.