Konflikti i interesit

AZHBR rikthehet sërish në qendër të polemikave, pasi një tjetër dosje tregon se fondet publike, të destinuara për fermerët, kanë përfunduar tek Ardit Bënja, kryetar i FRPD-së në Kuçovë. Ashtu si çdo aplikant, edhe Bënja ka përgatitur projektin e tij pranë një studioje të specializuar, të drejtuar nga inxhinieri Ylli Ago. Përmes kësaj skeme, ai ka kërkuar financim për ndërtimin e një stalle lopësh me vlerë totale 28.830.911 lekë të reja, ku sipas rregullave të AZHBR-së, parashikohet që aplikanti të përfitojë deri në 50% të investimit.

Projekti i hartuar nga Ylli Ago është shqyrtuar nga vajza e tij, Ana Ago, e cila punon si inspektore në Drejtorinë e Përzgjedhjes së Pranimit të Projekteve në AZHBR. Në këtë rast, për shkak të konfliktit të qartë të interesit, ajo nuk mund të refuzonte projektin që mban firmën e babait të saj. Rezultati? Lidhja e kontratës mes AZHBR dhe aplikuesit. Në shifra, Ardit Bënja ka përfituar 14.415.455 lekë të reja grant.

Dosja në fjalë nuk mbart vetëm firmën e Ylli dhe Ana Agos, por edhe firmën e drejtoreshës së përgjithshme të AZHBR, Ardita Kuçi. Së bashku me inspektoren Ago, ajo ka miratuar projektin, pavarësisht se emri i Ylli Agos shfaqet pothuajse në çdo faqe të dokumentacionit. Megjithatë, ky detaj duket se nuk është vënë re nga drejtuesja e institucionit. Madje, stalla e përfituar nga Bënja është promovuar si një histori suksesi nga vetë Ardita Kuçi. Aktualisht, kompania Bënja SHPK ka marrë vetëm 30% të grantit në formë parapagimi; pjesa tjetër jepet vetëm pasi të përfundojë i gjithë investimi.

Skema e AZHBR për vitin 2024 kishte një fond total prej 1.5 miliard lekësh, të shpërndara në pesë kategori kryesore: ndërtimi i serave diellore, instalimi i rrjeteve kundër breshërit, ndërtimi i stallave, mekanizimi bujqësor, si dhe kosha apo rrjeta peshkimi për akuakulturë. Kjo skemë erdhi si zëvendësuese e programit IPARD, i cili prej gati tre vitesh mbetet i pezulluar, pasi dyshohet se fondet e BE-së kanë përfunduar në skema korrupsioni, një dosje që aktualisht po hetohet paralelisht nga OLAF dhe SPAK.