“Mos na i merrni fëmijët”

Florina Cani, nëna e Martinit, të miturit që u vra me thikë nga bashkëmoshatari i tij një vit më parë në Tiranë, ka reaguar e tronditur pas lajmit se sot ka ndërruar jetë 15-vjeçari Erion Boba, i plagosur rëndë me thikë në Durrës.

Florina shpreh dhimbjen e thellë dhe akuzon institucionet për mungesë reagimi dhe masash, ndërsa i cilëson këto ngjarje “alarm për shoqërinë”.

“Më është tronditur shpirti përsëri. Për Erjonin kam shkruar shumë herë; dua të jem zëri i fëmijëve tanë, por e vërteta është e dhimbshme. Pse nuk reagojnë institucionet? Shkolla duhet të jetë vend sigurie, jo lufte. Martini, Eraldo, Erjoni… Emra fëmijësh që nuk duhej të ishin kurrë pjesë e lajmeve të dhunës. Janë plagë për zemrat tona dhe alarm për gjithë shoqërinë. Kërkoj mbrojtje për fëmijët tanë. Mos na i prekni fëmijët, mos na i merrni fëmijët. Zgjohuni! Merrni masa, ndaloni dhunën. Fëmijët tanë kanë të drejtë të jetojnë”, shkruan ajo.

Erion Boba, i mituri që u godit me thikë nga bashkëmoshatari i tij në Durrës më 25 nëntor, ndërroi jetë dje. Edhe pse mjekët u përpoqën deri në minutën e fundit, 15-vjeçari nuk arriti ta fitojë betejën me jetën.