VIDEO/ Arkivoli me foton e Ramës shfaqet në mes të protestës

Mbrëmjen e kësaj të shtune, në Tiranë është zhvilluar protesta e 35-të e të ashtuquajturit “Revolucioni i Flamingove”, e cila këtë herë ka shënuar një pjesëmarrje të shtuar edhe nga shqiptarët e diasporës.

Dhjetëra qytetarë të ardhur nga vende të ndryshme të Europës iu bashkuan turmës në kryeqytet, duke u solidarizuar me kërkesat e protestuesve për dorëheqjen e kryeministrit Edi Rama dhe largimin e klasës aktuale politike. Sipas organizatorëve, kjo pjesëmarrje konsiderohet një sinjal i fortë mbështetjeje nga jashtë vendit.

Protesta përkoi edhe me 62-vjetorin e lindjes së kryeministrit, çka u reflektua në mënyrë simbolike nga protestuesit përmes tortave me mbishkrime ironike dhe mesazhe politike.

Një nga momentet më të spikatura të mbrëmjes ishte shfaqja e një arkivoli në Bulevardin “Dëshmorët e Kombit”. I mbajtur nga disa protestues, arkivoli ishte i shoqëruar me një fotografi të kryeministrit, duke krijuar një skenë që tërhoqi vëmendjen e pjesëmarrësve dhe opinionit publik.

Me shfaqjen e tij, turma shpërtheu në thirrje në kor, duke përsëritur slogane kundër kryeministrit. Në të njëjtën kohë, nga podiumi u dëgjuan thirrje të tjera drejtuar autoriteteve, ndërsa folësit u përpoqën të mbajnë ritmin e protestës mes brohoritjeve të vazhdueshme.

Protesta u karakterizua nga një atmosferë e tensionuar, por edhe nga përdorimi i simbolikave të forta politike, që sipas pjesëmarrësve synojnë të përcjellin mesazhe të qarta kundër qeverisë aktuale.