Dalin pamjet e përplasjes në parkingun e TV Klan, pas daljes nga “Opinon”

Janë bërë publike pamjet e plota të konfliktit që ndodhi pas përfundimit të emisionit Opinion, në ambientet e jashtme të TV Klan.

Sipas pamjeve të kamerave të sigurisë, në përplasje janë përfshirë djali i Fatmir Shpellzaj dhe disa persona të tjerë, të cilët pak më parë kishin qenë të pranishëm në debatet e zhvilluara në studio.

Palët kishin marrë pjesë në emisionin e moderuar nga gazetari Blendi Fevziu, ku gjatë transmetimit pati herë pas here diskutime të tensionuara mes tyre.

Megjithatë, situata duket se ka dalë jashtë kontrollit menjëherë pas përfundimit të emisionit. Sapo pjesëmarrësit kanë dalë nga studio dhe janë drejtuar drejt parkingut të televizionit, përfaqësues të të dyja palëve janë përballur sërish me njëri-tjetrin.

Pamjet e kamerave të sigurisë tregojnë momentin kur disa persona që vijnë nga jashtë ambienteve të televizionit përplasen me persona që ndodheshin brenda rrethimit të godinës.

Fillimisht debati ka qenë verbal, por shumë shpejt situata ka degjeneruar në përplasje fizike me grushte, duke krijuar një moment tensioni në parkingun e televizionit.

Pamjet e konfliktit janë publikuar nga TV Klan, ndërsa mbetet e paqartë nëse për ngjarjen janë ndërmarrë masa nga autoritetet apo nëse ka persona të lënduar.