Skandal në ‘Secret Garden’ i Shefki Karamuçës

Në kompleksin rezidencial “Secret Garden” në Lundër u zhvillua sot një operacion i gjerë verifikimi nga Inspektoriati Kombëtar i Mbrojtjes së Territorit, IMT-ja e Bashkisë Tiranë dhe forca të Ministrisë së Brendshme. Grupi i përbashkët i kontrollit u angazhua në inspektimin e disa vilave të reja në zonë, pas informacioneve se ato janë ngritur jashtë procedurave ligjore të ndërtimit. Në qendër të vëmendjes qëndron aktiviteti ndërtimor i lidhur me Shefki Karamuçën, administrator i kompleksit dhe ish-funksionar lokal.

Sipas të dhënave të mbledhura nga hetimet e nisura në vitin 2023, në Mullet janë identifikuar të paktën shtatë ndërtime të reja që nuk përputhen me lejet e pretenduara nga përfituesit. Dokumentacioni i depozituar në institucionet përkatëse i paraqiste ndërhyrjet si rikonstruksione të banesave të dëmtuara nga tërmeti i vitit 2019, por verifikimet në terren kanë treguar se bëhet fjalë për vila të reja, të ngritura nga themelet.

Një tjetër element që ka tërhequr vëmendjen e hetuesve është mënyra e realizimit të këtyre ndërtimeve. Vilat e reja janë projektuar dhe ndërtuar me tipologji thuajse identike me godinat e “Secret Garden”, duke kopjuar volumet, pamjen e jashtme dhe stilin arkitektonik të kompleksit. Kjo ka krijuar dyshime se projektet janë marrë nga strukturat përgjegjëse të kompleksit dhe janë përdorur për të maskuar ndërtimet pa leje, me synimin që ato të përziheshin me pjesën ekzistuese të rezidencës.

Paralelisht, Prokuroria e Tiranës po shqyrton rolin e elementëve inspektues të IMT-së dhe procedurat e ndjekura në kontrollet e mëparshme, për të përcaktuar nëse ka pasur mospërputhje, neglizhencë apo ndërhyrje të qëllimshme. Hetimi pritet të zgjerohet edhe për mënyrën se si janë siguruar projektet arkitekturore dhe se cilat subjekte kanë pasur akses në to.

Dosja mbetet në zhvillim dhe autoritetet pritet të kryejnë kontrolle të tjera në zonë, ndërsa rezultatet e operacionit të sotëm do të përdoren për të përcaktuar hapat e mëtejshëm procedurale dhe ligjore.