Volodymyr Zelensky

 drejt zgjedhjeve

Presidenti i Ukrainës, Volodymyr Zelensky, pritet të shpallë më 24 shkurt planin për mbajtjen e zgjedhjeve presidenciale dhe një referendumi gjatë pranverës. Lajmi është publikuar nga Financial Times, e cila citon zyrtarë ukrainas dhe evropianë të përfshirë në procesin e planifikimit.

Sipas raportimit të medias britanike, përgatitjet për zgjedhjet presidenciale kanë nisur paralelisht me diskutimet për një referendum të mundshëm lidhur me një marrëveshje paqeje me Rusinë.

Ndërkohë, Reuters ka raportuar javën e kaluar se, sipas kuadrit që po diskutohet mes negociatorëve të SHBA-së dhe Ukrainës, çdo marrëveshje paqeje do t’i nënshtrohet votimit popullor përmes një referendumi. Votuesit ukrainas, sipas të njëjtit skenar, do të votojnë njëkohësisht edhe në zgjedhjet kombëtare.

Burimet e cituara nga Financial Times bëjnë me dije se zyrtarët kanë diskutuar mundësinë që zgjedhjet dhe referendumi të zhvillohen në muajin maj, në varësi të zhvillimeve në terren dhe ecurisë së negociatave.

Nëse ky plan konkretizohet, Ukraina do të përballet me një moment politik vendimtar, ku qytetarët jo vetëm do të zgjedhin drejtimin e ardhshëm të presidencës, por edhe do të shprehen drejtpërdrejt për një marrëveshje të mundshme paqeje me Rusinë.