4 dëshmitarë “rindërtojnë” skenën e krimit

24 orët e fundit kanë qenë sfiduese për Policinë dhe Prokurorinë e Gjirokastrës, të cilat po përpiqen të zbulojnë se kush fshihet pas vrasjes së biznesmenit italian Edoardo Sarchi, që ndodhi pas mesnatës së të premtes në zonën e Salarisë, në Tepelenë.

Sipas asaj që shkruan Top Channel, për të rindërtuar skenën e krimit dhe për të hedhur dritë mbi rrethanat e vrasjes, në pyetje janë marrë katër persona që ndodheshin në vendngjarje, ortaku i Sarchit në biznes, Eqrem Braçi, dy djemtë e tij, si dhe Armir Hitovezi, i cili pretendohet se ndodhej rastësisht në zonë në momentin e ngjarjes.

Sipas dëshmive të tyre, që deri tani përputhen mes tyre, mjetet me të cilat po udhëtonin drejt Nivicës janë qëlluar me breshëri armësh nga një person i panjohur, i cili më pas qëlloi sërish, duke e lënë të vdekur biznesmenin italian që ndodhej pranë një prej makinave.

Dëshmitarët pretendojnë se sulmuesi ishte në këmbë, por hetimi është i vështirë për shkak të mungesës së kamerave të sigurisë në zonë dhe faktit që nuk është gjetur asnjë gëzhojë në vendngjarje, raporton më tej Top Channel.

Aktualisht, dëshmitë e dëshmitarëve janë i vetmi informacion konkret në dorën e hetuesve, ndërsa grupi hetimor ka nisur të verifikojë të gjitha lëvizjet e Sarchit 24 orët para vrasjes. Po hetohen edhe konfliktet e mundshme dhe rrethit shoqëror apo profesional të tij, pasi dyshohet se autori apo bashkëpunëtorët mund të jenë persona që njihnin biznesmenin.